Nalunamiit kuulti avammut tuniniarneqalersoq

Canadamiut suliffeqarfiutaat Amaroq Minerals, ilaatigut Nalunami kuultisiorfimmi piiaanissamut akuersissuteqartoq, Kalaallit Nunaannit kuultimik avammut tuniniaasalerpoq. Tamanna Schweizimi akuiaavik aqqutigalugu pivoq, tassanilu suliffeqarfik Auramet aqqutigalugu pisisartunut tuniniarneqarluni.

Aammattaaq kuulti annikitsoq Tuluit Nunaanni akuiaavimmut immikkut ittumik suliaqartumut nassiunneqarpoq, tassani kuultip ”Single Mine Origin”-itut (SMO, piiaavimmiit ataasiinnarmeersoq, aaqq.) akuerineqarnissaa, tassa minguitsuunermut, piujuartitsinermut Nalunamilu aatsitassarsiorfimmeersuuneranik uppernarsaateqarnissaa immikkut ittumik piumasaqaatinik naammassinnissimanissaa siunertarineqarpoq. Kuulti taanna Kalaallit Nunaanni pinnersaatinik tunisassiortunut tuniniarneqartussanngorlugu suliarineqarpoq. Tamanna suliffeqarfimmit aggustip 14-ani tusagassiuutitigut nalunaarummi atuarneqarsinnaavoq.

Nuummi pinnersaatinik sannavik Kassoq, piginnittoq Palle Møller naapertorlugu, kuultimik Nunatsinneersumik 200 grammimik inniminniisimavoq, sulili tigusimanngilaa.

Angusat pingaarutillit marluk

Suliffeqarfik ukioq manna pingaarutilinnik angusaqarsimasoq Amaroq Mineralsimi pisortaq Eldur Olafsson oqarpoq.

– Nalunami aatsitassarsiorfimmik suliniuterput tamarmi siuariarluartoq nalunaarutigissallugu nuannaarutigaara. 2025-mi ukiup sisamararterutaata aappaata naanerani anguniakkat pingaarutillit marluk angusimavagut, tassa siullermik saffiugassanik akuiarneqanngitsunik nassiussillutalu avammut tunisivugut, taakkualu siullermik Canadamiut aningaasaanni 3,4 millionit dollarsinik (16 millionit koruunit missaat) akilerlugit tunineqarput, oqarpoq.

Aningaaseriviup nalunaarusiaa naapertorlugu ukiup pingajuani saffiugassat akuiarneqanngitsut 36 kiilut aningaaserivimmi toqqorsivimmut ikineqarput.

Teknikkikkut atortorissaarutit pissarsiarineqartut

Amaroq Minerals juunimi 400 million koruunit missaannik aningaasaliiffigineqarpoq, maannalu aningaasat taakkua ilaat atorlugit teknikkikkut atortorissaarutit – flotationsanlægimik taaneqartartut - pissarsiarinissaat siuarsarniarpaa. Tamannali suliarinnittarfiup piffissami aalajangersimasumi matuneqarnissaanik kinguneqassaaq, kisianni ukiunnginnerani suliassat pingaarutillit naammassineqarsinnaassapput. Aatsitassarsiornerli nalinginnaasumik ingerlaannassaaq, Eldur Olafsson ilisimatitsivoq.

Amaroq Mineralsip piginneqatigiilluni ingerlatseqatigiiffik Suliaq maajimi pilersippaa, tassanilu Kalaallit Nunaanni aatsitassarsiornermi sulianut aaqqiissutissanik, atortunik, kiffartuussinermik pilersuinermillu neqerooruteqarneq siunertaavoq. Joan Plant aamma Eldur Olafsson ingerlatseqatigiiffimmi ingerlatsisuupput, taannalu Nuummi Nuna Advokaterimi C/O-mik adresseqarpoq.