Nersussuaateqarneq imminut akilersinnaanngitsoq

“Imminut pilersorneq nunatta siunissaani pingaaruteqartuni qitiusutut Naalakkersuisut isigaat. Inuussutissanik pitsaanerpaanik asseqanngitsunillu isumalluutissaqarpugut. Taakkua nerisassiassaapput Issittumi inuuniarsinnaanissamut iluaqutissaalluartut. Taamaattoq ullumikkut pisiniarfiit ilisiviini takussaavallaanngillat, tamannalu Naalakkersuisut ilissi suleqatigalusi allanngortikkusuppaat.”

Imminut Pilersornissamut Periusissiaq 2025-2030-mut atuuttup saqqummiunneqarneranut atatillugu qinigaaffimmi kingullermi Nunalerinermut, Imminut Pilersornermut, Nukissiutinut Avatangiisinullu Naalakkersuisuusimasoq, Kalistat Lund, Inuit Ataqatigiit, taama aallarniuteqarluni allappoq.

Taamaakkaluartoq Kujataani nersussuaatillit nersussuaateqarneq akilersinnaanngitsutut nalilerpaat, ukiunilu qaninnerpaani nersussuaateqarnertik unitsiinnartariaqalissallugu taakkua oqaatigaat.

Kujataani nersutaateqarneq politikkikkut annertuumik sumiginnarneqartoq aammalu Imminut Pilersornissamut Periusissiaq oqaasiinnaasoq timitaqanngitsoq, Savaatillit Peqatigiit Suleqatigiissut, SPS, siulittaasuat Suulut Hansen isumaqarpoq.

Ajorluinnartoq 

Nersussuit Kujataaneersut 254-it siorna Narsami Neqi A/S-imut tunineqarput, taakkulu neqaat katillugit 27 tonsit missaannik oqimaatsigaat – tunisallu aatsaat taama amerlatigisut Neqi A/S-imi pisortap Ole Vestergaardip oqaatigaa.

Angusaq tamanna Neqi A/S-imut pitsaasuugaluartoq, akerlianik nersussuaatilinnut atugassarititaasut ajorluinnartut SPS-imi siulittaasoq Suulut Hansen oqarpoq.

- Neqit nunatta avataaniit tikisinneqartartut akitsuutaat 2023 aallarnerfigalugu peerneqarput, tamatumalu kingunerisaanik neqit nunatta avataanersut pisiniarfinni akikinnerulerput. Tamannalu nunatsinni nersussuit neqaasa akitigut unammillersinnaajunnaarnerannik kinguneqarpoq, taanna oqarpoq.

Kujataani savaatillit nersussuaatillillu paasissutissiinerat naapertorlugu nersussuit nunatsinneersut neqaasa Neqi A/S-imut tuninerini siornatigut kilomut 86 koruunit akigitinneqartarpoq, kisiannili taanna ukioq kingulleq 70 koruunimut apparneqarpoq. Kilomulli akigitinneqartup appaqqinneqarnissaa ilimasaarutaasimasoq savaatillit aamma oqaatigaat.

- Qanittumi neqinik tunisinermi kilomut akigitinneqartartoq pillugu Neqi A/S-imut isumaqatiginninniarnitta kingorna Kujataani nersussuaatillit arlallit nersussuaataarutiinnartariaqalissallutik oqaatigaat.

- Nunatsinni imminut pilersornerulernissaq politikkikkut anguniagaavoq, kisianni periusissiaq taanna nersussuaatilinnut iluaqutaanngilaq. Nersussuaatillit politikkikkut tapersersorneqarnissaat annertuumik amigaataavoq, tamannalu soorunami assut ajuusaarnarpoq, Suulut Hansen, Qassiarsummi savaateqartoq oqarpoq.

Naalakkersuisut nunalerineq pillugu periusissiaat 2021-meersoq naapertorlugu 2030-mi savaatillit inuussutissarsiornermut tapiissutinik pisartut ikinnerulissapput.

Imminut akilersinnaanngitsoq 

Andala Lund Ammassivimmi 60-it tungaanut nersussuaateqarpoq Qorlortukasimmilu 500-it missaannik savaateqarluni.

- Ilumoorpoq nersussuaateqarneq imminut akilersinnaajunnaariartorpoq, taamaattumik nersussuaateqarnermi atugassarititaasut pitsaanerulinngippata uagut nersussuaateqarnermik unitsitsiinnarnissarput avaqqunneqarsinnaanngilaq, taanna oqarpoq.

Savanut nersussuarnullu nerukkaatissat naggorissaatissallu marloriaataat sinnerligit akitsorsimasut, tamannalu nersussuaateqarnerup imminut akilersinnaassusaanut annertuumik aamma killiliisoq, taassuma erseqqissaatigaa.

Uniinnartariaqartoq 

Sofus Frederiksenip 2015-imi Dexterinik nersussuaateqarneq tamakkiisumik aallartippaa, maannakkullu Kalaallit Nunaani nersussuaateqarnermik inuussutissarsiuteqarnermik annerpaamik Narsap Iluani ingerlataqarluni. Taassuma siorna aatsaat taama amerlatigisunik tunisaqarluni 220-it missaat Neqi A/S-imut tunivai, maannakkullu piaqqat ilanngullugit 120-it sinnilaarlugit nersussuaateqarluni.

- Qaqiniaaluusaarluta qaqigatta tunisinermi akit apparneqarput, tamannalu nersussuaateqarnerup imminut akilersinnaajunnaarneranik kinguneqarpoq. Taamaattumik ukioq manna tunisiguma, piaqqat sinneruttut allippata aappaagu tunereerukkit, nersussuaateqarneq unitsiinnartariaqassallugu siunniuppara.

- Tapiissutinik pissarsisarnissarput kissaatiginngilara akerlianilli imminut akilersinnaasumik ingerlasinnaalernissarput kissaatigaara. Kisianni tunisinermi akit taama appasitsigitillugit imminut akilersinnaasumik ingerlasoqarsinnaanngilaq, taamaammat nunatsinni imminut pilersornerulernissamik politikkikkut anguniagaqarneq piviusorsiunngilaq, taanna oqarpoq.

Kalaallit Nunaani nersussuaateqarnermik inuussutissarsiuteqarneq inerisaaffigineqarnissaanut periarfissarissaartoq Sofus Frederiksenip 2021-mi Sermitsiamut oqaatigaa, maannakkulli pissutsit allarluinnaasut taassuma erseqqissaatigaa.

Aningaasartuutit qaffasippallaartut 

Miki Egede Igalikumi 500-t missaannik savaateqarpoq 70-illu missaannik Gallowayinik nersussuaateqarluni. Siorna Nersussuit qulit missaat Neqi A/S-imut tunivai.

- Nerukkaatissat naggorissaatillu akii qaffakkiartorput taakkununngalu ukioq manna 600.000 koruunit tungaanut aningaasartuutigivagut, taamaammat nersussuaateqarneq imminut akilersinnaassappat tunisinermi aki qaffasinnerusariaqarpoq, taanna oqarpoq.

Oktoberip naalernerani nersussuit Neqi A/S-imut tunineqartarput. Neqi A/S-imiit oqaaseqartitsiniaraluaratta iluatsinngilarput.