Nersussuup neqai aatsaat taama amerlatigisut tunisassiarineqartut 

Nunatsinni nersussuaateqarnermi neqinik pilersuineq siorna rekortiliiffiuvoq – tamannalu isumaqarluni ukioq manna kalaallit nersutaataannik katillugit 27 tonsinik Nunatsinni pisiniarfinnut tunisaqartoqarsimasoq.

Ole Vestergaard, Narsami Neqi A/S-imi pisortaq taama oqaluttuarpoq.

- Nersussuit 254-it 2024-mi toqoraavitsinni toqorarpavut, taakkunannga 228-t Dexterimik taaneqartartut 26-llu Gallowayimik taaneqartartut. Nersussuarpassuit 27 tonsit missaannik neqimik pissarsiffigaavut.

Ineriartorneq maluginiarneqarluartoq

Nunatsinni nersussuarnik tunisassiorneq ukiut qulit ingerlaneranni malunnaatilimmik ineriartorsimavoq. Narsami toqoraavimmi 2014-imi nersussuarnik 25-nik toqoraasoqarpoq.

Neqip sulisuisa nersussuarnik toqoraaneq siorna ingerlappaat, toqoraavimmi toqoraanermut ilinniarsimasumit siulersorneqarlutik.

- Savaaqqanik toqoraasarnerput immikkut ilisimasaqarfigineruarput. Taamaattorli nersussuarnik toqoraanermut piginnaanivut pitsanngorsarusuppavut. Taamaattumik ukioq manna marsimi ilinniartut marluk neqaarniarlu toqoraasartut aqutsisuat Danmarkimiittoq, Jyllandip kujataanut Tistrup Slagtehusimut paasisassarsiortillugit angalatippavut.

Neqimi nersussuarpassuit siorna toqorarneqartut, nersussuaatilinnit sisamaneersuupput, tassaasut: Sofus Frederiksen Narsameersoq, Leif Kunuk Lund Qanisartuuneersoq, Miki Egede Igalikumeersoq aamma Andala Lund Qanisartuuneersoq aamma Alluitsup Kangerluani kangerluani Qallimiuneersoq.

Sofus Frederiksen Narsameersoq taamaallaat nersutaateqarnermik ukiorpassuarni ingerlataqarsimavoq, allalli pingasut taaneqartut savaateqarlutillu nersutaateqarnermik ingerlatsisimallutik.

Sofus Frederiksenip Leif Kunuk Lundillu nersutaatinik Dexterinik, allallu marluk nersutaatinik Gallowayinik, nersutaateqalersimapput.

- Nersussuit Dexter-it mikinerupput, neqaallu aggukkatut tunisassiarineqarnerusarlutik, nersussuit Galloway-it anginerupput, neqaallu bøffinut siaasagassatullu allanut tulluartuullutik, Ole Vestergaard oqaluttuarpoq.

- Ukioq manna nersussuit neqaannik Pisiffimmi tuniniaaneruvugut. Pisiffiup neqit angisuukkaarlugit pisiarisarpai, namminnerlu pisiniarfimminni uullisarlugit.

- Brugseni aamma Pilersuisoq pisisunut ilaapput, soorlumi aamma umiarsuit takornariartaatit soqutiginnittunut ilaasimasut, taakkumi ilaasuminnut nersussuup neqaanik Nunatsinneersumik sassaallerusuttarmata, Ole Vestergaard oqarpoq.

Nersussuit pitsaasut

Nersussuit assigiinngitsut marluk taaneqartut Nunatsinni pissutsinut tulluarluinnartuupput. Ukioq kaajallallugu silamiissinnaapput – taamaallaallu siallinngitsumut qimaaffissaqarnissartik pisariaqartittarlugu.

Dexterit Irlandip kujataata kitaanit naggueqarput. Uumasunut naggueqatigiiaannut pisoqaanerpaanut ilaapput. Dexterit maattuujupput, uumaffigisinnaallugillu soorlu Australiami inoqajuitsoq, Canadami aputilik, Schweizimi alpini Danmarkimilu silami allanngorartuartumi uumasuusinnaallutik. Aamma kinguaassiorluartarput. Marlunnik ukioqaleraangamik piaraqalersarput, nalinginnaasumillu nersussuaq uumanermini 14-eriarluni piaraqalersinnaasarluni.

Gallowayit Skotlandimit naggueqarput, tamaanilu asimi silap pissusia peqqarniissinnaasarluni. Gallowayit uumasutut ilakkuminartutut isigineqartarput, aammami nassoqanngillat. Dexterinit anginerupput qivioqarlutillu meqqoqarlutik, issimut sialummullu aasakkullu sullinernut illersuutaasunik. Naammagittartuupput uumasoqatigiiaallu allat uumaffigisinnaanngisaanni pitsaasumik neqeqaramik tunisassiarineqarsinnaallutik.