PNNP-mik taaneqartartoq pillugu nalunaarut decembarimi tusarniaassutigineqartoq qinersisoqarnissaalu sioqqutitsiarlugu saqqummiunneqartoq, nunami aalisarnermik ingerlatsiviit namminersortut annersaata Polar Seafoodip isumakuluutigingaarpaa, maannami avataani qaleralittassiissutit pingajorarterutaat peerneqarsimapput.
Polar Seafood pisassiissutit ikilisinneqarmata aalisarneq ukiumut qaammammik ataatsimik sivikillimmat, taamaammallu inuttat akissarsiamik 18 procentii annaammatigit ukioq tamaat sulisitsisinnaanissartik qulakkeersinnaajunnaarlugu nassuiaavoq.
PNNP-mik taaneqartartoq pillugu nalunaarut decembarimi tusarniaassutigineqartoq qinersisoqarnissaalu sioqqutitsiarlugu saqqummiunneqartoq, nunami aalisarnermik ingerlatsiviit namminersortut annersaata Polar Seafoodip isumakuluutigingaarpaa, maannami avataani qaleralittassiissutit pingajorarterutaat peerneqarsimapput.
Polar Seafood pisassiissutit ikilisinneqarmata aalisarneq ukiumut qaammammik ataatsimik sivikillimmat, taamaammallu inuttat akissarsiamik 18 procentii annaammatigit ukioq tamaat sulisitsisinnaanissartik qulakkeersinnaajunnaarlugu nassuiaavoq.
Pakatsineq
- Tusarniaassummut akissutitsinni kingunerusinnaasut tamakku ersarissumik oqariartuutiginikuuagut, soorluli atuarneqarsimanngitsulluunniit. Tamanna pakatsissutigeqaara, nalunaarummi inuppassuarnut sunniuteqassammat, Bent Salling, Polar Seafoodimi pisortaaneq oqarpoq.
Nuna tamakkerlugu aalisarneq inuussutissarsiutitut inissisimasoq, illoqarfinnilu mikinerusuni aalisartut aningaasarsiaat niuernermut pingaaruteqarluinnartut aammattaaq erseqqissarpaa. Isertitai annikillippata tamanna najukkani niuertarfinni malugineqarsinnaassaaq.
Inuttassarsiuussineq
Akissarsiat apparpata sulisussarsiornissaq ajornakusoornerussasoq Polar Seafood nassuiaavoq.
Nalunaarut nutaaq Polar Princessimi inuttanut, marlunnik, tamarmik 26-nik inuttaqarluni, paarlakaattunik inuttalimmut, toqqaannartumik sunniuteqassasoq Polar Seafood nassuiaavoq.
- Pisassiissutigisartakkatta ilamerngiluunniit annaagutsigit inuttavut ataasiinnanngortittariaqassavagut. Tamanna aalisartut ikinnerulernerannik siunissamillu nalorninarnerusumik inissisimanerannik kinguneqassaaq, tamannalu aalisartunut suliffimminnik annaasaqarnissamut aarlerinartorsiortunut annertuumik kinguneqassaaq, Jens Jørgen Egede, Polar Seafoodimi kilisaatini pisortaq oqarpoq.
Sulilluartoqarsinnaanera navianartorsiortoq
Inuttat taarseraluttuinnarnissaat, tamannalu pissutigalugu sulinerup pitsaavallaarunnaarnissaa ernumassutigaa.
- Inuusuttut aalajangersimasumik aningaasarsiorsinnaanngikkunik ukiumut ulluni 250-ini imarsiornissaq nuannarinngilaat. Inuttat paarkaattut annaassagaluarutsigit inuit aalisartuaannarnissaat ajornakusoornerussaaq, kilisaatinut pisortaq oqarpoq.
Sigguk A/S-imi, Polar Nanoq-mik piginnittumi, pisortap Frans Heilmannip nalunaarut nutaaq suliffeqarfimmut sakkortuumik eqquissasoq aamma ernummatigaa.
Ullumikkut inuit 50-it missaanniittut Polar Nanormi aningaasarsiortarput. Umiarsuarmi inuttat aalajaatsuupput, Frans Heilmannilli aningaasarsiornerup ajorsiartornerani pissutsit allanngornissaat ernummatigaa.
- Umiarsuaaraateqarpugut, tunumilu silarlukkajuttumi aalisartarpugut. Inuttat akissarsiaat aamma appartinneqassappata inuusuttorpassuit umiarsuarnut anginerusunut nuukkumaartut isumaqarpunga, Frans Heilmann oqaluttuarpoq.
2006-imi nutaatut peqataalersut
Sigguk A/S 2006-imi aalisarnermi nutaatut pilersinneqarpoq. Taamanikkut aalisarnermik ingerlatsilersup aalisarnermik ingerlatsilersumi suleqateqartariaqarnera Naalakkersuisut piumasaqaatigaat, Sigguullu Polar Seafood suleqatiginiarlugu aalajangerpoq. Ullumikkut – ukiut 19-it qaangiuttut – ingerlatseqatigiiffik nutaamik ingerlatsilernissamik kissaateqarneq pissutigalugu pisassiissutiminik arsaarneqarpoq.
