Politikerit Kangerlussuaq puigorsimavaat

Air Greenlandip timmisartorsua Nuummut missinnaanani Danmarkimut utiinnaraangat Kangerlussuarmi nunallu sinnerani inuussutissarsiorneq aningaasarsiornerlu eqqugaasarput.

Nunaqarfimmi aqutsisut, tassaasut Vivi Schultz Grønvold, Anna-Karen Hoffmann aamma Stina Steenholdt-Sørensen, taama isumaqarput. Taakkua Kangerlussuarmi silap allanngujaatsuunera ukiorlu kaajallallugu qaqugukkulluunniit miffigineqarsinnaanera atorluaqqullugu nunami politikerinut kaammattuipput.

- Kangerlussuarmiinnaanngitsoq aammali nunap sinneranut Nuup avataaniittunut iluaqutaassaaq, nunaqarfiup aqutsisuini siulittaasoq Vivi Schultz Grønvold oqarpoq.

Politikerit timmisartuussisarnerup allanngortinneqarnerani Nuummut iluaqutaasinnaanera kisiat isiginiarsimagaat, nunallu sinneranut iluaqutaasinnaasut puigorsimagaat taanna isumaqarpoq.

Takornariat Unescop kingornussassanut allattorsimaffianniittoq Aasivissuit – Nipisat misiginissaanut periarfissaannut kalluaavoq.

– Nipisat, Sisimiut eqqaaniit Kangerlussuarmi Sermersuup eqqaata tungaanut angitigisoq

Kangerlussuaq takornariakinnerusoq

Vivi Schultz Grønvold niuertarfiuteqarpoq, takornariallu nunaqarfimmut tikittartut ikileriarnerat nammineerluni malugaa.

Vivis Shopip ukiut qulit ammanerani Kangerlussuarmi tamanit nalunnginneqarpoq, ukiullu ingerlanerini Kangerlussuarmut aqqusaarsimasut aamma nalunngilaat.

Kangerlussuaq nunami takornarianit ornigarneqarnerpaat tulliattut inissisimanikuuvoq, Ilulissat takornariaqarnerpaalluni. Kangerlussuarlu ukioq kaajallallugu takornariarfigineqarnerpaasartoq Ilulissat ukiui takornariarfiunerpaaffimmi ornigarneqartarpoq.

– Novembarip 28-ata kingorna timmisartuussinerit allanngortinneqarnerat nunap sinneranut iluaqutaanani Nuummut kisimi iluaqutaavoq, Kangerlussuarmi nunaqarfinni aqutsisut siulittaasuat isumaqarpoq.

Timmisartuussisarnerit allanngortinneqarnerat taassuma niuertarfiutaanut aamma sunniuteqarsimasoq Vivi Schultz Grønvold oqarpoq.

 – Vivis Shop ukiut qulit sinnerlugit pigisara decembarip 23-ani 2024-mi matuara.

– Mittarfiup illutaata iluani napparsimasut utaqqisarfigisimasaat atulerpara Arctic Shopilu ammarlugu, oqarpoq. Taassuma kalaallit tunisassiaannik tuniniagaqarnerulluni aamma danskit tunisassiaannik mamakujunnillu tuniniagaqalaarluni oqaatigaa.

Ukiup affaanut pilersaarut naammanngilaq

Kangerlussuaq aqqusaarlugu sapaatit akunneranut ataasiarluni Danmarkimut Danmarkimillu timmisartuussisoqartarnissaa ukiup affaanut maanna pilersaarutaavoq. Timmisartuussisarneq marsip 17-iani aallartippoq.

- Ukiup affaanut pilersaarutit inuussutigisinnaanngilarput, nunaqarfinni aqutsisunut ilaasortat kaammattuinerminni tikkuarpaat.

- Kangerlussuaq takornariaqarfiit annersaata tulliattut inisseqqippat inuiaqatigiinnut tamanut iluaqutaassaaq, tamannalu kaaviiaartitanik, suliffinnik akileraarutinillu akiliinermik annertunerulersitsissalluni, Vivi Schultz Grønvold oqarpoq.

- Nuup mittarfiani sila pissutigalugu unammilligassarpassuit pissutaallutik Kangerlussuaq eqqugaarujussuareersimavoq - takornariat ikileriarnerat pissutigalugu aamma nunarsuarmit tamarmeersunit nuannarineqarluartut tammaviutsussamik piniarnerit aningaasarpassuarnik akiliillutik angalaniarlutik angallanneqarsinnaannginnerat pissutigalugu.

- Kangerlussuarmi takornariartitsisartut mikinerit inuiaqatigiinnut kommunillu karsianut tapersiisut eqqugaarujussuarput. Kinguaattoornerit amerlasuut Kangerlussuarmuunnaanngitsoq, aammali nunap sinnerani sumiiffinni amerlasuuni Nuup avataaniittuni eqquipput, Vivi Schultz Grønvold oqarpoq.

- Air Greenlandip Kalaallit Nunaannut tamarmut angalasussaagaluartut ilagalugit Danmarkimut utinnarani Kangerlussuup mittarfia atortartuuguniuk unammilligassat taama annertutigisimassanngikkaluarput, siulittaasoq oqarpoq.

 Ilaasunut pitsaanerusoq

Air Greenlandip Kangerlussuup mittarfia atorsimasuuguniuk, ilaasut nunap sinneranut Kangerlussuarmit ingerlaqqissinnaasimagaluarput. Soorlu taamaaliortoqartarsimasoq aamma Danmarkiliartussat Kangerlussuakkoorlutik aallarsimasinnaagaluarlutik. Tassa imaappoq, ilaasut Danmarkimut utertut pilersaarutit malillugit ullormi tassani tikissimasinnaagaluarput. Airbus Nuummut missinnaanngikkaluartoq timmisartut Dash-8-t ilaasunik Nuummiit Kangerlussuarmut timmisartuussisarsinnaagaluartut Vivi Schultz Grønvold isumaqarpoq.

- Taamatuttaaq timmisartut Dash-8-t amerlanertigut ulloq taanna Danmarkimeersunik Kangerlussuarmiit Nuummut timmisartuussisinnaagaluarput.

- Air Greenland ukiup qaammataani pingasuni siullermi aningaasartuuterpassuaqarsimavoq, ilaatigut timmisartuussinerit utiinnartariaqarnerannut, Danmarkimilu unnuinernut ilaasumullu ataatsimut orsussamut akiliutit pissutigalugit. Aningaasartuutit taakkua ilaat sipaarneqarsinnaagaluarput imaluunniit Kalaallit Nunaannut tutsinneqarlutik, taamaalilluni timmisartut ullormi tassani Nuummut apuussinnaannginneranni inuiaqatigiinnut iluaqutaasimassagaluarluni. Københavnip mittarfiata Københavnillu kaaviiaartitaannut tapertaanatik.

 Naalakkersuisunut kaammattuisut

Nunaqarfimmi aqutsisunut ilaasortat Naalakkersuisunut ima allapput:

“Nunatta aqutsisui. Ilissi allannguisinnaanissamut pissaaneqarpusi. Ilissi nunarput tamakkerlugu ineriartortitseqataasinnaavusi. Periarfissitsigut minnerpaamik sap. ak. ataasiarluni Air Greenland Københavnimiit Kangerlussualiartarnissaa ukioq tamaat.

Taamaaliornikkut illoqarfissualiartuungitsut ilaasorisinnaavaat, minnerunngitsumillu piffik nunatsinni immikkuullareqisoq kusanaqisorlu uagut piorsaanissatsinnik sinaakkusissavarsi. Takornariaqartitsineq pikkoriffigaarput. Pikkoriffipput atorluarusupparput”