Qaleralittassissuutissat annertuut pilerngunneqartut

- Ingerlatseqatigiiffiit aqqaneq-marluk Kitaani avataasiornermi pisassiissutinut neqeroorutigineqartunut qinnuteqarsimapput, Aalisarnermut Piniarnermullu Naalakkersuisoqarfimmi immikkoortortami pisortaq Katrine Kærgaard Sermitsiamut oqarpoq.

Avataasiorluni qaleralinniarnermi ingerlatsisoq anneq ataaseq minnerilluunniit marluk pisassinneqarsinnaasut Naalakkersuisoqarfiup naatsorsuutigalugu neqeroorummut atatillugu allappoq.

- Qaleralittassat, saarullittassat nataarnartassallu pillugit qinnuteqartut ataasiinnaat marlulluunniit pisassinneqarnissaat Naalakkersuisunit aalajangiiffigineqartarpoq, immikkoortortaqarfimmi pisortaq oqarpoq.

Taamaakkaluartoq suliffeqarfiit taama amerlatigisut Aalisarnermut Piniarnermullu Naalakkersuisoqarfimmut qinnuteqarsimasut tupaallaatiginngilaa. Qalerallimmi Nunatsinni aalisarneqartuni naleqarnerpaapput.

- Nalitoorujussuimmi neqeroorutigineqarput, taanna oqarpoq.

Avataasiorluni qaleralittassiissutit 4.600 tonsit, saarullittassat 1.960 tonsit qaleralinnillu pisassiissutit 167 tonsit soqutiginnittunut neqeroorutigineqassasut Naalakkersuisut siuliisa siorna decembarimi aalajangerpaat. Pisassiissutit Aalisarnermut Piniarnermullu Naalakkersuisoqarfimmit ukioq manna februaari aallartittoq neqeroorutigineqarput.

Halibutip tunisassiassanik pilersuinissaq qulakkeerumagaa  

Ingerlatseqatigiiffik qinnuteqartunut ilaasoq piginneqatigiilluni ingerlatseqatigiiffiup Halibut Greenlandip pisortaata Erik Sivertsenip Sermitsiamut uppernarsarpaa. Ingerlatseqatigiiffiup pisassinneqarnissaa qinnuteqaatillu Naalakkersuisuniit akuerineqarnissaa ingerlatseqatigiiffimmit neriuutigineqarpoq.

Naalakkersuisut sapaatit akunnerisa tulliuttut marluk ingerlaneranni, taamaalillunilu Kalaallit Nunaanni amerlasuut aasaanerani sulinngiffeqannginneranni, aalajangerumaartut ingerlatseqatigiiffik sorleq neqeroorutiginninnermi ajugaanersoq Aalisarnermut Piniarnermullu Naalakkersuisoqarfimmit Katrine Kærgaardip naatsorsuutigaa.

Halibut Greenlandip ullumikkut isertitaasa annersaat Ilulissani tunisassiorfimminni qaleralinnik tunisassiornermit pissarsiarineqartarput. Tunisassiassat aalisartuniit tulaassorneqartarput, ingerlatseqatigiiffilli nammineerluni avataasiorluni kilisaatersunngilaq.

- Pisassiissutinik tunineqarumaarluta neriuutigaarput. Qanorli amerlatigisunik qinnuteqarsimanerluta oqaatigiumanngilara.

- Tunisassiorfitsinnut tunisassiassanik pilersuinissaq qulakkeerniarlugu qinnuteqarpugut. Tunisassiorfik ullumikkumiit tunisassiornerungaatsiarsinnaavoq, Erik Sivertsen oqarpoq.

Tunisassiorfik ukiumut 8.000 tonsinik tunisassiorsinnaavoq.

Pisat 25 procentii tuniniarneqartussaasut

Ingerlatseqatigiiffiup pisassiissutinik tamakkiisumik ilaannaasumilluunniit neqerooruteqartup pisat 25 procentii tulaassortussaavai.

Halibut Greenland maannamuugallartoq avataasiornermik ingerlatsisuunngilaq. Sinerissamut qanittumi qaleralinniarneq pillugu ingerlatsilersut nutaat Namminersorlutik Oqartussat piumasaqaataat malillugit kilisaammik pisinissamut ukiumi ataatsimi piffissaqarput.

Kalaallit Nunaanni aalisarnermut inatsit nutaaq naapertorlugu ukioq manna januaarip aallaqqaataanit avataasiorluni qaleralittassiissutit tuniniarneqarsinnaalerput. Tassa aalisariutit pisassiissutigisaminnik niueqateqarsinnaapput.

Ingerlatsiviit sisamat qaleralittassiissutimik pingajorarterutaat annaassagaat  

Inatsisit kingunerisaannik ingerlatseqatigiiffiit sisamat Polar Seafood, Sigguk, Qaleralik aamma Royal Greenland, maannamut Kitaani avataasiorluni qaleralittassiissutigineqartartut, pisassamik pingajorarterutaat annaassavaat. Tamannalu Royal Greenland Namminersorlutik Oqartussanit pigineqartoq minillugu ingerlatseqatigiiffinniit allaniit isornartorsiungaatsiarneqarpoq.

Qaleralittassat saarullittassallu immikkoortinneqarnerannut pisassiissutit piginnittut siammarterneqarnissaat aalisartullu nutaat, inuusuttut, avataasiorluni aalisarnermut peqataalernissaat Naalakkersuisut kissaatigaat politikkikkut tunngaviuvoq.

Pisassiissutit Aalisarnermut Piniarnermullu Naalakkersuisoqarfiup februaarip aallartinnerani neqeroorutigilerpai. Qinnuteqaatillu apriilip 30-ata tungaanut tiguneqarsinnaanikuupput.

Ukiuni qulini pisassiissutigineqassasut

Naalakkersuisut qaleralittassiissutit ukiuni qulini atuuttussanngorlugit agguaassavaat, saarullittassiissutillu ukiumoortumik agguaanneqartassallutik.

Aalisarsinnaanermut akuersissutinik tunineqarumalluni qinnuteqartarniaraaanni suliffeqarfimmik tamakkiisumik kalaallinit pigineqartariaqarpoq, tassa kalaallinit 100 procentimik pigineqarpoq.

Tamanna qallunaat suliffeqarfiutaata North Atlantic Seafoodip, Jyllandip avannaaniittup, Halibut Greenlandimi piginneqataassutimi 25 procentingajaasut tuninerinik kinguneqarpoq.

- Tamanna illuatungeriit tamarmik kissaatigaat, pisassiissutimmi inunnit ingerlatseqatigiiffinnillu nunaqavissunit pigineqartariaqartut nunatsinni aalisarnermut inatsimmi allassimavoq.

Piffissaq kingulleq atorlugu tunigai 

- Aalisarnermut inatsimmut nutaamut naleqqussarnissatsinnut ukiut qulit atorpavut, maannakkulli malereerparput. Halibut Greenland tamakkiisumik kalaallinit pigineqarpoq. 98,5 procentii nunaqavissuupput, Erik Sivertsen oqarpoq.

Ingerlatseqatigiiffik aalisartunit 136-nit pigineqarpoq.

North Atlantic Seafoodip Halibut Greenlandimi piginneqataassutsini piffissaq kingulleq atorlugu, tassa apriilip 29-ani, pisassiissutit pillugit neqeroorutinut qinnuteqaatit tunniunneqarnissaata ullumik ataatsimik sioqqullugu, tunivai. Tunineqarfiisa ullua Det centrale virksomhedsregisterimi (suliffeqarfiit qitiusumik allattorsimaffiat, aaqq.), CVR-imi, allassimavoq.