Sakkutuut timmisartortartut silaannarmi orsernissamut timmisartutaassasut
Danskit timmisartui malersuutit Kalaallit Nunaannut sukkasuumik nuunneqarsinnaalerniassammata Kunngeqarfik Nato-p timmisartunik silaannarmi orsiutissanik timmisartuussisarnissamik isumaqatigiissutaanut ilannguppoq
Australiamiut timmisartuat A330 MRTT timmisartunik F-16-inik orsiisarpoq. Timmisartut malersuutit Kalaallit Nunaannut sukkasuumik nuunneqarsinnaaniassammata maanna Kunngeqarfik Danmark assinganik periarfissaqalissaaq
Foto: Wikipedia
Danskit illersornissaqarfiat timmisartunik malersuutinik
F-16-inik pingasunik marlunngornermi Kangerlussuarmut aallartitsivoq –
timmisartullu malersuutit Kalaallit Nunaanni ulluinnarsiutaalerumaartut
ilimanarluinnarpoq.
Tassami Danmarkip Sverigellu Nato-p MMF-imik
suleqatigiinnerannut, maannakkut timmisartunik qulinik tankinik assartuutinik
taaneqartartunik, Hollandimi Eindhovenimi Tysklandimilu Kølnimi
sakkutooqarfimmit ingerlanneqartumut, ilanngunnerat Ullormi tamatumani
nalunaarutigineqarpoq.
Suleqatigiinnerup annertusineqarneratigut timmisartut
orsussamik assartuutit aqqaneq-marlunngussapput. Timmisartut nutaat marluk Danmarkimi
inissinneqassasut pilersaarutaavoq. Sumi inissinneqassanersut suli aalajangerneqanngilaq,
Flyvestation Aalborgili Air Transport Wingimut aallaavioreersoq
periarfissatsialaavoq.
Angalasinnaanerulissasut
Timmisartut orsussamik assartuutit nutaat atorlugit danskit
timmisartuisa sorsuutit angalasinnaanerat annertusineqarpoq, taamaalillutik
ajornartorsiortoqartillugu Kalaallit Nunaannut sukkasuumik
aallartinneqarsinnaassapput. Qallunaat timmisartuutaat F-16-it nalinginnaasumik
900 km angalasinnaapput, timmisartullu nutaat F-35-it 2.200 km
angalasinnaapput.
A330 MRTT nutaaq orsiinissamut atorneqaannassanngilaq, aammali sakkutuunik, nuimasunik napparsimasunillu assartuinissamut atorneqartassaaq.
Foto: Wikipedia
Taamaammat timmisartut F-16-it pingasut marlunngornermi
Kangerlussuarmut tikittut 3.300 kilometerit missaannik isorartussusilimmi
timmisartuussinerminni uniinnaratik timmisartorsinnaaniassagamik franskit
timmisartuannik orsiisartumik ingiallorneqarput. Franskit timmisartuat Air
Greenlandip Atlantiku qulaallugu timmisartorisimasaa Norsaq assigalugu Airbus
330-200-iusoq sakkutooqarfimmi atorneqartussatut naleqqussagaavoq.
Timmisartut nutaat
Danmarkip Sverigellu MMF-imut ilanngunnerisa saniatigut
Airbus timmisartunik orsussamik assartuisartunik marlunnik nutaanik,
timmisartunut sorsuuttunut orsussamik assartuinermut atorneqaannaratik allanik
aamma piginnaasalinnik, pilersuinissamik isumaqatigiissuteqarpoq.
Timmisartut aamma assersuutigalugu sakkutuunik, nuimasunik
napparsimasunillu assartuisinnaassasut suleqatigiinnermi siunertarineqarpoq.
Timmisartut nutaat marluk nunat Nato-mut ilaasortaasut
pisiarisaat A330 MRTT-nik taaguutillit Airbus A330-800 neo-pput, Air
Greenlandip timmisartuatut Tuukkatut nunatsinni amerlanernit
ilisimaneqarluartutut, ittut.
- Danmarkip MMF-imut ilanngunneratigut timmisartunillu A330
MRTT-nik marlunnik pisinikkut Europap avannaani, avannaarsuani Issittumilu
silaannakkut sakkutuulersornissatsinnut piginnaanigut annertuumik
pitsanngorsarneqarput, illersornissamut ministeri Troels Lund Poulsen oqarpoq.
MMF-ip maannakkut suleqatigisai Danmarkip Sverigellu saniatigut tassaapput
Belgia, Tjekkiet, Tyskland, Luxembourg, Holland Norgelu.
