Sulisitsisut oqallitsitsineranni politikerit akerleriittut
Aalisarneq naalakkersuisoqatigiit illuatungiliuttullu akornanni suli akerleriissutaavoq annerpaaq. Inuussutissarsiornermili politikki pillugu oqallinnermi Nuummi politikerit isumaqatigiipput. Tusarnaartunit ikiorneqarnissaq pisariaqartiinnarsimavaat.
Oqallittut saamerlermiit: Naaja Nathanielsen (IA), Juno Berthelsen (N), Jens-Frederik Nielsen (D), Aqqalu Jerimiassen (A) aamma Vivian Motzfeldt (S).
Foto: Oscar Scott Carl
Nunatsinni politikerit nuimasut arlallit Nuummi Hotel Hans Egedemi tallimanngornermi ualikkut katersuupput. Ukiuni sisamani tulliuttuni suut suliarineqarnissaannik naatsorsuutigineqarsinnaanersut pillugit oqallinnissamut Sulisitsisut qaaqqusipput.
Inuussutissarsiorneq pillugu oqallinneq aalisarneq pillugu oqallinnermik sakkortuumik aallartippoq, aalisarnerlu pingaarnertut sammineqarluni.
– Inuussutissarsiornerup nukittuup pitsaanerpaamik sinaakkuteqarnissaa pingaaruteqarpoq. Aalisarnermut inatsilli Kalaallit Nunaannut akisuvoq. Inuussutissarsiortut namminersorlut pilliutigineqarput, Jens-Frederik Nielsen (D) oqarpoq.
Aalisarnerup pingaaruteqassusaata eqqartorneqarnerani aalisarnermut inatsit naalakkersuisoqatigiit illuatungiliuttullu partiivisa isumaqatigiinngissutaasa pingaarnerit ilagaat. Inatsimmi suut tamarmik ajortuunngikkaluartut Aqqalu Jerimiassen (A) oqarpoq.
Partiilli illuatungiliuttut aamma assigiinngitsunik pingaartitaqarput. Naleqqap 3 sømilit killeqarfiunera 12 sømilinut annertusineqassasoq kissaatigaa – aamma tunumi namminersortut aalisarnerunissaat, partiip oqaaseqartartua Juno Berthelsen erseqqissaavoq. Atassutip EU-mik arlalitsigut suleqateqarsinnaaneq periarfissatut isigaa.
Isummat assigiinngitsut
Suliffissaaleqisut pillugit oqallinnermi politikerit sammisaat aamma assigiinngillat. Aalisakkanut suliffissuarni sulineq inunnit appasinnertut inissisimaffittut isigineqartarnera Aqqalu Jerimiassenip uggoraa.
Malittarisassat maanna atuuttut pissutigalugit nunanit allanit nunamut utertut ilaasa aalisarnissartik tunuarsimaarfigigaat Juno Berthelsenip oqaatigaa. Naleraq naapertorlugu tamanna kalaallinik tunulliussinerulluni avataaneersut iluaqutigaat, tamannalu inatsisitigut kinaassutsimik nalunaarsuiffeqalernissamut pissutissaasoq alla. IA sinnerlugu oqalliseqatasoq allatut isumaqarpoq:
– Kinaassutsimik nalunaarsuineq inatsisitigullu allagartalersuineq pissutsinik allannguinissaat takorlooruminaatsippaara. Nunami maani sulisussaaleqisoqarpoq, inuillu ikiliartorlutik. Suli avataanit sulisussarsiortariaqarpugut, Naaja Nathanielsen oqarpoq.
Aalisarnermut inatsit ukiorpassuarni oqallisigineqareerluni peqqissaartumillu suliarineqareerluni piulersoq taassuma naqissuserpaa. Naalakkersuisooqataasut partiiata aappaaneersut tamanna taperserpaa.
- Inuussutissarsiuterput pingaarnerpaaq soorunami tamatta ineriartortikkusupparput, Vivian Motzfeldt (S) oqarpoq.
Inuusuttunut suliat amerlanerusut
Akerleriinneq suli atuuppoq, taamaattoqartuartarporli. Amerlanersaat tusareernikuuavut. Kialliuna politikerit isumaqatigiinngitsut ataatsimuulersissinnaagai? Bo, AutoNordimi biililerisoq, taannaavoq.
Politikerit inuusuttut atorfinitsinneqartarnerannut sinaakkutit allanngortinnissaannik takorloorsinnaaneraat, inuusuttut ilaatigut suliaqarnerulersinnaanerannik kinguneqartumik Bop apeqqutigaa. Politikerit taanna isuma nuannaraat.
– Inuusuttut sulinerat imminermi perorsaataavoq. Inuusuttut suliaqarsinnaanerat pitsaasuuvoq, susassaaleqiinnaratik ajortuiliorlutillu, Aqqalu Jerimiassen oqarpoq.
- Inuusuttut ajornerusutut isigineqalersissanngilagut, Naaja Nathanielsen oqarpoq - suliassaqartinneqarsinnaaneralli isumaqatigalugu.
- Suliat naviananngippata ajunngilaq. Tamatta isumaqatigiissutigigunarparput, Vivian Motzfeldt oqarpoq, meeraanerminilu Qaqortup eqqaani ilaqutariit savaateqarfiani ikiuutaasimanerminik eqqaasaqarluni.
Taamatullu ingerlavoq, Nuummi politikerit tallimanngornermi ualikkut isumaqatigiissuteqarsinnaallutik. Qinersiviup tulliani qanoq pisoqarumaarnera takussavarput, inuusuttut ilumut biilileriffinni suliaqarnerulissanersut.
