- Akunnittarfimmi neriniartarfinnilu sulisussaaleqineq ajornartorsiutiginerpaavarput – neriuppungalu Inatsisartunut ilaasortanngortussat tamanna iliuuseqarfigisinnaassagaat.
Helge Tang, Sulisitsisut akunnittarfinnut, neriniartarfinnut takornariaqarnermullu ataatsimiititaliaanni siulittaasoq oqarpoq.
- Akunnittarfimmi neriniartarfinnilu sulisussaaleqineq ajornartorsiutiginerpaavarput – neriuppungalu Inatsisartunut ilaasortanngortussat tamanna iliuuseqarfigisinnaassagaat.
Helge Tang, Sulisitsisut akunnittarfinnut, neriniartarfinnut takornariaqarnermullu ataatsimiititaliaanni siulittaasoq oqarpoq.
- Nuummi mittarfiup nutaap pilersinneqarnera pissutigalugu takornariaqarneruleriartorpugut, taamaammat maanna iliuuseqartoqartariaqarpoq – nunanillu allaneersunit sulisussarsiornermi allaffissornikkut ajornannginnerulernissaq kissaatigineqarpoq. Nunaqavissut suliffissaqartikkusuppagut, paasisariaqarparpulli nunaqavissut pisariaqartitavut tamaasa pissarsiarisinnaanagit.
Helge Tangip aamma akunnittarfinnik ingerlatsisut siunissaat ernummatigaa, tassami siorna kalaallit politikerii takornariaqarnermut inatsimmik nutaamik akuersipput, tamatumalu suliffeqarfiit takornariaqarnermut tunngasut akuersissummik piumagaanni minnerpaamik 2/3-iannik kalaallinit pigineqartariaqarnerat ilaatigut kinguneraa.
Siunissaq pillugu nalorninartorsiorneq
- Tamanna nunanit allanit timmisartuutileqatigiiffinnut siunissami periarfissanik nalorninartorsiortitsivoq – tamannalu piffissami Nuummi timmisartoqarfiup, aammalu Ilulissani Qaqortumilu timmisartoqarfissat nutaat pisariaqartitsiffianni ajuusaarnarpoq, Helge Tang oqarpoq.
- Aningaasaliinissamut patajaassuseq siunissamilu toqqissisimaneq pingaaruteqarput, ingammik akunnittarfinnik neriniartarfinnillu ingerlatsisunut, sanaartornerni annertuuni ukiorpassuarnut pilersaarusiortoqartariaqarmat. Politikkikkut nalorninartoqaleraangat – soorlu Kalaallit Nunaanni maannakkut pisoq – tamanna siumut oqaatigiuminaassisarpoq, tamannalu aningaasaliisartunik nangaassutaasumik kinguneqartarluni.
- Inatsisinik allannguinerit ilaannikkullu siumut oqaatigineqarsinnaanngitsunik inatsisiliornerit inuussutissarsiutinut allanut, soorlu aatsitassarsiornermut aalisarnermullu, qanoq sunniuteqartartut takulereerpagut.
- Inatsit takornariartitsinermik siuarsaassasoq, aappaatigulli inatsisip oqaaseqaataani nassuerutigalugu inuussutissarsiortunut aningaasaqarnikkut allaffissornikkullu kingunerlutsitsissasoq Naalakkersuisut oqarnerat maluginiarnarpoq. Oqaaseqaatit naapertorlugit inatsit malillugu sullissinermi suliffeqarfiit aningaasartuuteqassasut, akuersissuteqalinngitsullu niuerutertik annaassagaat allassimavoq.
Ajuusaarnartumik takutitsisoq
- Tamanna aningaasaliisunut aningaasaliisinnaasunullu ajorluinnartumi takutitsineruvoq. Tunngaviusumik atugassarititaasut aalajaatsuunissaat naatsorsuutigineqarsinnaanngikkaangat, taava Kalaallit Nunaanni millionilinnik aningaasaliinissaq qanoq illersorneqarsinnaava? Politikkikkut aalajangiinerit suliffeqarfinnut aningaasarpassuarnik aningaasaliisimasunut atugassarititaasut allanngortikkaangatigik tamanna nalorninartorsiortitsingaalertarpoq. Tamanna takornariartitsinerup ineriartorneranut akornutaasinnaasoq Sulisitsisuni ernummatigaarput.
- Siuarsaanissamut sinaakkutissat naleqquttut pilersinnissaat politikkerit suliassaraat. Aningaasaliissuteqartartut takornarialerinermillu piujuartitsisumik ineriartortitsiniarutta, aalajaatsunik siumut oqaatigineqarsinnaasunillu sinaakkutissaqalertariaqarpugut.
Helge Tangip maanna 74-inik ukiullip Sulisitsisut akunnittarfinnik, neriniartarfinnik takornariaqarnikkullu ataatsimiititaliaanni siulittaasutut politikerinit Inatsisartunut qinigaasussanit tusaaneqarnissani neriuutigaa.
- Ukiut 40-t matuma siorna ataatsimiititaliami ilaasortanngorpunga. Taamaammat misigisarpassuaqarlungalu takusarpassuaqarpunga. Politikerit angut misilittagaqarluartoq tusarnaarsinnaagat maanna neriuutigaara, Helge Tang Sermitsiamut oqarpoq.