Trumpip siunnersortigisimasaa Kalaallit Nunaanni milliardilinnik aningaasaleerusuttoq
Amerikamiut Donald Trumpimiit aallartitaannginnerartut Kalaallit Nunaanni milliardilikkaanik aningaasaleerusuput.
- Inuussutissarsiornermik suleqatikkalu sukkanerpaamik 10 milliardit dollarinik, 66 milliardit koruunit missaat, aningaasaleerusunnerput oqaloqatigiissutigaarput, Drew Horn KNR-imut oqarpoq.
Amerikamiut niuertut Kalaallit Nunaanni aatsitassarsiornermut milliardilikkaanik aningaasaleerusupput, USA-llu naalagaaffia sinnerlugu sulinnginnerarlutik.
KNR USA-mi nukissiornermut ministereqarfimmi nunanut allanut tunngasunut allaffimmi pisortaasimasumik Drew Hornimik oqaloqateqareerluni allappoq. Taanna Donald Trumpip præsidentitut atuuffiani siullermi atorfilittaavoq.
Suliffeqarfimmi GreenMet-imi, ilaatigut nunatsinni aatsitassarsiornermut aningaasaliisartuusumi, maanna pisortaavoq. Taamaattumillu Kalaallit Nunaannukarluni.
- Aningaasaliisartut peqatigalugit aatsitassarsiornermut, nukissiornermik ineriartortitsinermut, aalisarnermut allanullu aningaasaliiniarpunga, Drew Horn KNR-imut oqarpoq.
- Inuussutissarsiornermik suleqatikkalu sukkanerpaamik 10 milliardit dollarinik, 66 milliardit koruunit missaat, aningaasaleerusunnerput oqaloqatigiissutigaarput.
Iluareqqusaarluni pissaanermik atuinnginnerartoq
Aningaasat suminngaanneernersut, qanoq qaqugulu aningaasaliissutigineqarniarnersut ilisimaneqanngilaq. Aatsitassarsiornerli sivisuumik ingerlasarpoq — ingammik Kalaallit Nunaanni Issittumilu immikkut unammilligassaqarfiusuni.
Kalaallit Nunaat atortussiassanik aatsitassanillu qaqutigoortunik, teknologiini nutaaliaasuni mingutsitsinnginnerusunik atuinissamut batteriinut pingaaruteqartunik, pisuussuteqarluarpoq. Kina nunarsuarmi tamakkuninnga pilersuisut siuttoraat.
Suliffeqarfiit Australiameersut, Canadameersuut Tuluit Nunaanneersullu Kalaallit Nunaanni maanna aatsitassarsiorfeqarput.
Drew Hornip innuttaasut isumaannik sunniiniarluni USA-p sinnerlugu "iluareqqusaarluni pissaanermik" atuinngitsoq oqaatigaa.
- Qularinnittut paasisinnaavakka. Tassa tunuliaqutara pissutigalugu iluareqqusaarlunga pissaanermik atuisutut innuttaasunik sunniiniartutut isigineqarnera paasisinnaavara.
- Taamaaliunnginnera neriuppunga upperineqalerumaartoq, tassa aningaasaqarnikkut siuariarsaaqataanissamik kissaateqarnerput uppernarsarneqarsinnaassasoq, KNR-imut oqarpoq.
Trumpip oqariartuutai niuernermut tunngasutut isigineqassasut
USA-p præsidentiata Donald Trumpip nunarsuarmi qeqertat annersaannik tiguaarusunnera nunarsuaq tamakkerlugu uissuummissutigineqarpoq.
Drew Hornip oqaatsit taakku niuernermut tunngassuteqarnerarpai, oqaatsillu "tiguaarusunnermik“ paasineqarnerat piviusorsiunngitsutut taallugu.
Jens-Frederik Nielsenip naalakkersuisunut siulittaasunngornerata kingorna Kalaallit Nunaannut allartitatut siullertut taallugit Reutersip siusinnerusukkut allaaseraa.
Drew Hornip "Kalaallit Nunaannik pisinissamik imaluunniit tiguaanissamik aaqqissuussiniarnerarneqarneq quianaannartoq" nutaarsiassaqartitsivimmut oqaatigaa.
USA-p Danmarkimi aallartitaa Jennifer Hall Godfrey Danmarkimut oqaloqatiginiarlugu aggersarneqarpoq.
Tusarfiit marluk atiisigut saqqummiunneqanngitsut naapertorlugit USA Kalaallit Nunaanni kilitsissiaqarnerulerniartoq Amerikamiut aviisianni Wall Street Journal-imi allaaserineqarmat aallartitaq aggersarneqarpoq.
/ritzau/
