100-liisoq qulangiuaarisoq
Charlotte Petersen, Sikallutta, inuuimmini Air Greenlandimit tunissutisivoq Nuuk qulaaniit isiginnaarsinnaanngorlugu.
-100-iisut akuttoqimmata ulloq Air Greenlandimittaaq nalliusserusussimavarput, tuniniaanermi ussassaarinermilu pisortaq Christian Keldsen oqarpoq.
Sikalluttap kissaataasa ilagisimavaat Nuuk qulaaniit isiginnaarusullugu, taamaattumillu Air Greenlandimiit tunineqarpoq Nuuk qulangiuaarlugu qulimiguulimmut ilaanissaanik.
Tunissutissiassaa tunniunneqarpoq Sikallutap ilaqutarpassuani ilagalugit utoqqaat illuanni ullaakkorsiornerani.
Sikallutta suli silassoreqaaq piumasaminillu aalajangiussisimasuulluni. Aatsaat 96-inik ukioqarluni utoqqaat illuannut nuuppoq. Ueqarsimanngilaq qitornaqaranilu.
Inuusunnermini kiffaasarsimavoq, inuunerullu ilaa utoqqaat illuanni, maanna fritidshjem Aqqalummi, ningiuusimavoq.
Sikallutta qatanngutigiinni 14-iusuni angajulliup tulleraa, ataatagalugu organi, taalliortoq erinniortorlu Jonathan Petersen.