11-nik ukiulimmik toqutsisimanermik suliaq nunatta eqqartuussivianit suliareqqinneqalersoq
Nunatta Eqqartuussivianit niviarsiaqqamik aqqanilinnik ukiulimmik Aasianni toqutsitsimanerup suliareqqitassanngortinneqarsimanera aalajangiiffigineqassaaq, aviisi AG taamatut allappoq.
Niviarsiaraq aqqanilinnik ukiulik 2020-mi novembarip qaammataani unnukkut Aasianni maqaasineqalerpoq, pifissamilu sivikitsuinnarmi ujaasisoqareersoq niviarsiaraq toqungasoq nassaarineqarluni.
Ullualuit qaangiummata taamanikkut angut 27-nik ukiulik tigusarineqarpoq, suliamilu toqutsisimasutut unnerluutigineqarluni.
Siorna decembarip qaammataani angut toqutsisimasutut ukiuni arfineq-pingasuni pinerluuteqarsimasunut inissiisarfimmiittussanngorlugu eqqartuunneqarpoq, suliarli illersuisumit unnerluussisussaatitaasumillu suliareqqitassanngortinneqarsimavoq.
Illersuisut ukiuni arfinilinni pineqaatissinneqarnissaa anguniarsimavaa, unnerluussisussaatitaasulli ukiuni qulini pineqaatissinneqarnissaa anguniarsimallugu.
Nunatta Eqqartuussivini suliaq ullumi marlunngornermi naggataamik suliarineqassasoq, aviisi AG allappoq.
Unnerluutigineqartup eqqartuussisoqarnerani nassuerutigisimavaa, niviarsiaqqamut persuttaasimalluni, toqunnissaali siunertarisimanagu oqaatigalugu. Aamma meeraq pineqartoq ilisimanerarsimanngilaa, taanna oqarsimavoq.