13.000 koruunit peqquserluuteqartumut nassiussimagai
Innuttaasoq ataaseq qaammatit arlallit ingerlaneranni inummut ataatsimut aningaasanik nuussisarsimavoq, innuttaasullu maanna inuk nassiussiffigisarsimasani politiinut unnerluutigisimavaa.
Inuit ilisarisimanngisat inuit attaveqaqatigiittarfiisigut attavigisarnissaat mianersuuttariaqarpoq - pingaartumik inuk pineqartoq aningaasanik qinnuteqarpat.
Innuttaasup ataatsip tamanna uppernarsisariaqarsimavaa, innuttaasormi pineqartoq inummut Facebook aqqutigalugu attaveqarfigisartakkaminut qaamatit arlallit ingerlaneranni aningaasanik nuussisarsimavoq.
Pigaartut pisortaata Julie Senderovitz Bendtsenip oqaluttuaraa, innuttaasoq pineqartoq aningaasarpassuarnik kingusinnerusukkut utertitsivigineqarnissamik neriorsuiffigineqartarluni nuussisarsimasoq, sapaatilli-akunnerani kingullermi naammagittarunnaarsimalluni suliaq politiinut suliassanngortissimavaa.
Facebookikkut ikinngutigiumaneqarsimasoq
- Qaammatini arlalinni attaveqaqatigiittarnikkut aningaasat nuunneqartarsimapput, pinerluffigineqartullu taamaammat attavigisartakkani tutsuiginartuusorisimavaa, piffissallu sivisuup ingerlanerani 13.000 koruunit sinnerlugit nalilinnik nuussisarsimalluni, pigaartut pisortaat oqaluttuarpoq.
Pigaartut pisortaata ilanngullugu oqaluttuaraa, innuttaasoq peqquserluuteqarsimasorisamit Facebookikkut ikinngutigiumaneqarsimasoq, tamatumalu kingornatigut nalunaaruteqartarfikkut Whatsapp-ikkut taakku marluullutik imminnut attaveqatigiittarsimasut.
- Peqquserluuteqarsimasut suliassanngortissimavarput, suliamilu paasissutissat takutippaat, tamanna Kalaallit Nunaanni inuit marluk akornanni pisarsimasoq.
Pigaartut pisortaata oqaluttuaraa, suliaq misissuiffigineqartoq.