15-inik ukiulik Aalborgimi ammasumik killisiorneqarpoq
Taamaaliorneq assigiinngitsineruvoq, Kalaallit Nunaanni Amnesty International oqarpoq. Taamaaliortarnerli Danmarkimi nalinginnaavoq, paasisimasaqarluartoq oqarpoq.
Sapaatip akunnerani kingullermi Aalborgip eqqartuussuviani killisiuisoqarmat tusagassiortunik politiinillu tusarnaartoqarpoq. Tassani toqutsisimasutut pasineqartup 15-inik ukiullip Kalaallit Nunaanneersoq qanoq iliorluni 85-inik ukiulik Gerda Møller najugaani Aalborgimiittumi pinngitsaalillugulu toqussimanerlugu oqaluttuaraa.
Naak nukappiaqqap ukiui pissutigalugit matoqqasumik ingerlatsisoqarnissaa illersuisup unnerluussisullu piusimasarisimagaluaraat Inatsisit Tunngaviusut tunngavigalugit killisiuineq ammasumik ingerlanneqarpoq. Eqqartuussusillu matoqqasumik ingerlatseqqisinik itigartillugu ammasumik ingerlatsivoq.
Tamannalu Kalaallit Nunaanni Amnesty Internationalip isornartorsiorpaa.
– Inatsisit tunngaviusut tunngavigalugit killisiuinerup ammasumik ingerlanneqarnera uanga immikkoortitsinertut isigaara, siulittaasoq Roland Thomsen oqarpoq, nukappiaqqallu 15-inik ukioqaraangata matoqqasumik ingerlatsisoqartaraluarnera innersuussutigalugu.
Taamaattumik ammasumik ingerlatsisoqarnera qallunaat isaanniit isigalugu tupinnartuunngilaq.
– Taamaaliornerup isorineqarnera tupigaara, Århus Universitetimi pillaatissiisarneq pillugu professori Gorm Toftegaard Nielsen Sermitsiamut oqarpoq.
15-inik ukiullip Qaqortumi killisiuinermi nassuereersimanera pingaartuunerarpaa. Politiillu erseqqilluinnartunik uppernarsaatissaqarnerarlugit.
– Pisimasoq sakkortuujullunilu kiap toqutsisuunerat qularnartoqanngilaq. Taamaattumik tusagassiortut eqqartuussivimmut isersinnaatitaappput, unnerluutigineqartoq misiarluniluunniit uppernarsaatissat nalorninaateqarsimagaluarpata taamatut pisoqarsimanavianngikkaluarluni, Gorm Toftegaard Nielsen oqarpoq.
Danmarkimi ukiut ingerlanerini matoqqasumik ingerlatsisarneq mianersorfigineqarnerulersimanerarpaa. Qallunaallu tusagassiortut matoqqasumik ingerlatsisarnermut maalaarutiginninnissamut periarfissarissaarnerulersimanerarlugit.
Sermitsiaq atuaruk.