15 kilo hash fjersynimut toqqugaq
Suliassaq hashimut 15 kilumut fjernsynimut toqqorlugu Aalborgimiit Nuummut nassiunneqarsimasumut tunngasoq sisamanngormat ualikkut eqqartuussissutigineqarpoq.
Gaba Egede Nuummeersoq aamma Danni Kim Nguyen Københavnimeersoq junip arfineq pingajuanni, qulingiluaanni 16-iannilu Nuummi eqqartuussaapput, hashimik 15 kilumik anngiortukkut eqqussisimasutut unnerluutigiuneqarlutik.
Hashi fjernsynimut toqqorlugu 2009-mi oktoberip 12-ianni Royal Arctic Line aqqutigalugu Nuummut nassiunneqarsimavoq, taannali Knud Egedemut Nuummiittumut allagartalerneqarsimasoq 2009-mi oktoberip 27-ianni Nuup umiarsualiviani ilanngaaserisut nassaaraat. Tassunga tunngatillugu Knud Egede ukiup aappaa avillugu isertitsivimmiittussanngorlugu eqqartuunneqareersimavoq.
Inuk hashimik 15 kilunik nassiussisuusimasoq pingasunngormat eqqartuussinermi ilisimannittuuvoq, taassumallu Gaba Egede, Knud Egede Danni Kim Nguyeniluunniit nalunerarpai atermilu hashimik nassiussinermut atorneqarsimanera nuanniilluinnartuunerarlugu.
Gaba Egede immikkoortunut pingasunut unnerluutigineqarpoq, siulleq tassaalluni hashimik 5 kilunik tunisaqarsimaneq. Unnerluussisussaatitaasut Gaba Egedep 2009-mi naatsorsuutai aningaaserivimmilu kontoa kukkunersiuisartumut misissortissimavaat, taannalu nalunaarusiamini naatsorsuusiorsimavoq, Gaba Egede hashimik 5 kilunit ikinnerunngitsunik tunisaqarsimasoq taakkulu 1.498.000 kroninik iluanaarutigisimagai.
Immikkoortut aapparaat hashimik 15 kilunik anngiortukkut eqqussisimaneq, kingullerlu tassaalluni isertitsisarfimmi tigummineqartilluni mobiltelefuunimik pissarsisimaneq.
Danni Kim Nguyen aamma immikkoortunut pingasunut unnerluutigineqarpoq, tassalu hashmik 15 kilunik Kalaallit Nunaannut nassiussisimaneq, najukkamilu 2,6 gramminik hasiuteqarlunilu sakkunik pigisaqarneq.
Pinngitsuunerarput
Gaba Egedekkut Danni Kim Nguyenilu hashimik 15 kilunik anngiortukkut Kalaallit Nunaannut eqqussisimannginnerarput. Gaba Egedelu aamma hashimi 5 kilunik, 1.498.000 kroninik isertitsissutigisimasaminik tunisaqarsimannginnerarpoq.
Unnerluussisussaatitaasut piumasaraat Gaba Egede ukiut sisamaat avillugu isertitsisarfimmiittussanngortinneqarlunilu 1.498.000 kroninik mobiltelefuunimillu arsaarinnissuteqarfigineqassasoq.
Unnerluussisussaatitaasut piumasaraat Danni Kim Nguyen ukiuni pingasuni isertitsisarfimmiittussanngortinneqassasoq aammalu hashimik 2,6 gramminik sakkumillu ataatsimik arsaarinnissuteqarfigineqassasoq.
Illersuisut erseqqissunik uppernarsaatissaqannginneq pissutigalugu taakku marluullutik pinngitsuutitaanissaat piumasaraat.
Suliamut tunngatillugu sisamanngornermi junip 17-ianni nal. 14 eqqartuussummik nalunaarutiginnittoqassaaq.