20 gradinik issittumi ikaartarfiliussasut
Kangerlussuarmi ikaartarfik nutaaq aattuleqqinnissaa sioqqullugu naammassineqareersimassaq. Tamanna sulinermi ilungersunartunik atugassaqartitaanissamik isumaqarpoq
Kalaallit Nunaanni pissutsit eqqarsaatigalugilluunniit piffissami matumani Kangerlussuarmi suliassaq nalinginnaanngitsoq suliarineqarpoq, aasaq qarsutsisoqarnerani ikaartarfiup kuugussaanerata kingorna illoqarfiup immikkoortortai marluk ikaartarfimmik pitsaasumik attavilerniarlugit.
Taama Qeqqata Kommuniani issittumi ingeniøri Fritz Baumann Petersen Sermitsiaq.AG-mut oqaluttuarpoq.
Tassami ikaartarfissap nutaap 30 meterinik takissuseqartussap betonngiusussallu sananeqarnera 20 gradinik issittumi pissaaq.
- Tamanna nalinginnaanngitsorujussuuvoq, aattulernissaali sioqqullugu ikaartarfik naammassereersimassappat sulisariaqarpugut, oqarpoq.
Fritz Baumann Petersen naapertorlugu ikaartarfik kingusinnerpaamik 2013-imi juunip qiteqqunnerani naammassineqareersimassaaq.
Læs "Midlertidig broløsning trækker ud"
Læs "3.500.000 liter vand i sekundet"
Læs "- Det er sgu lidt uhyggeligt"
Issittumi sulisinnaajumalluni piffissami matumani Kangerlussuarmi ullaakkut 18 gradit angullugit issittarmat tupersuarmik kiassakkamik sullivigineqartumik nappaasoqarsimavoq, Fritz Baumann Petersen oqarpoq.
Kangerlussuarmili ukiorpat sulineq unitsikkallarneqartariaqassaaq, 30 gradinik issilerpat ikaartarfimmi sulisinnaanissaq takorloorneqarsinnaanngimmat, Fritz Baumann Petersen oqarpoq.
Betonngimik ikaartarfissaq 30 meterinik takissusilik maannalu sananeqartoq pisoqqamit allaanerussuteqarpoq kuuk tamaat ikaarlugu ataannartumik silaannakkoortinneqassammat. Siornatigut ikaartarfik marloqiusaasimavoq, kuup qeqqani qaarsortamut atassuserneqarsimasoq.
Ikaartarfiup nutaap atorneqarsinnaalernissaata tungaanut aaqqiissutaagallartumik pilersitsisoqarsimavoq, kuuk ikaarniaraanni kuup kuuffia maanna sikusimasoq aqqusaartariaqarluni.
Tamanna soorunami pisinnaanavianngilaq kuuk kooqqilerpat.