2008-mi toqutsinerit arfineq-pingasut
Politiit 2008-mut Ukiumoortumik Nalunaarusiaat atuagassaq sakkortuvoq. Kisitsisini inuit tunuliaqutaapput.
Ukiumut 2007-mut sanilliullugu Kalaallit Nunaanni toqutsisarnerit qaffariaateqaratillu appariaateqanngillat. Inuit arfineq-pingasut 2007-mi 2008-milu toqutaapput.
Illuatungaatigulli toqutseriarnerit qaffariaateqangaatsiarput. Tamakku tamarmik atuagassaapput Politiit 2008-mut Ukiumoortumik Nalunaarusiaanni.
2008-mi toqutseriarnerit 22-it nalunaarutigineqarsimapput 2007-mi 17-iullutik. Aamma persuttaasarnerit qaffariaateqarput 2008-mi 833-it kisitsisaatigineqarput 2007-mi ikinnerulaarlutik, tassa 808.
Toqutsinerit arfineq-pingasut pipput Nanortalimmi, Narsami, Nuummi (marluk), Aasianni, Ilulissani (pingasut), Tasiilamilu.
Persuttaanernik nalunaarutiginninnerit amerlaqisut Nunatsinni politeeqarfinnut 16-inut agguataarsimapput. Amerlanerit Nuummi, tassa 240-t nalunaarutigineqarsimallutik. Tasiilami persuttaanerit 99-it nalunaarutigineqarsimapput, Ilulissani 89-illutik.
Pinerluttaalisitsinermut inatsimmik unioqqutitsinerit ataatsimut isigalugit, tassa inuunermut, timimut aamma tillinniartarnernut assersuutigalugit, Kangerlussuarmi nalunaarutiginninnerit ikinnerpaapput, tassani 2008-mi katillugit 38-ummata. Nuummi amerlanerpaapput 2099-it nalunaarutiginnissimammata.