2009-mut Aningaasaqarnermut Inatsit amigartoorfiusussaq
Naalakkersuisunut ilaasortap Aleqa Hammondip - Siumut - tallimanngormat 2009-imut aningaasaqarnermut inatsisissatut siunnersuut 441 millioner koruuninik amigartooruteqarfiusussaq saqqummiuppaa.
Amigaartoorutissat annertunissaat siumungaaq ilimagineqareersimavoq, kisianni taamak annertutiginissaa ilimagineqarnani.
Aningaasaqarnermut inatsit ukiup aappassaa tulleriiginnarnik annertuumik amigartoorfiuvoq. Ukioq manna aningaasaqarnermut inatsit 300 millioner koruunik amigartooruteqarfiuvoq.
Suliniuteqarfiit arlallit
Aappaagumut Aningaasaqarnermut inatsisissatut siunnersuummi aningaasartuuteqarfiusussat annertuut arlaliupput. Namminersornerusut ilaatigut aluminiumik aatsitsiviliassamut immikkut ittumik 374 millioner koruunit atorniarpaat.
Aningaasartuut taanna suliassaqarfinnut soorlu aluminiumik tunisassiornermut, aatsitassanut takornariaqarnermillu inuussutissarsornermut salliutitsilluni ingerlatsiniarnermut ersiutaavoq. Namminersornerusut aamma ilinniartitaanerup tungaatigut suliniutit ingerlatiinnarniarpaat, naalakkersuisut piffissamut 2005-imiit 2012-imut katillugit 400 millioner koruunit tassunga atugassatut immikkoortisimallugit.
Tigussaasunngorlugu ilaatigut imaappoq, ilinniarfiit amerlanerulersinniarneqarlutillu kollegianik sanaartorneq annertusarniarneqarpoq. Aamma meeqqat inuusuttuaqqallu, kiisalu inunnik isumaginninneq peqqinnissaqarfillu pingaarnerpaanut ilaatillugit inissinneqarsimapput.
Aningaasaqarnermut inatsimmi amigartoortutit qaffakkiartornerannit ilaatigut Inatsisartut ukioq manna siusinnerusukkut ilaatigut taassuma tungaatigut aningaasartuutissanut arlalinnut aningaasaliissuteqarsimammata.
Ilaatigut ilaqutariinnut inissiiviusartunut tapiissutaasartut qaffanneqareersimapput. Aaqqiissullu nutaaq taanna 2008-mi julip 1-ianiit atuutilerpoq. Meeqqanut tapiissutit ilaqutariinnut ukiumut 180.000 kr. ataallugit isertitaqartunut 2009-mut qaffanneqarpoq. Meeqqanut akilersuutit qaammammut 758 kr.-iniit 1.000 kr.-inut qaffanneqarput.
Isumaginninnerup tungaatigut innarluutilinnut Ilisimasanik Siunnersuinermullu qitiusumik ingerlatsivimmik pilersitsisoqarpoq, angjoqqaanngoqqaartussanullu pikkorissartitsisarneq eqqunneqarluni. Saniatigut innaarluutillit utertullu amerliartorput, taassuma tungaatigut aningaasartuutit amerliartorlutik.
Peqqinnissaqarfimmut tunngatillugu naalakkersuisut misileraanertalimmik kræftimut inuunermulluunniit navianartorsiortitsisunut nappaatinut allanut nakorsaanermut aningaasaliissuteqarsimapput, illissap paavatigut kræftimut akiuussutissamut aningaasaliissuteqarsimallutik aammalu nappassimmavimmi uninnganermi angajoqqaanik ingiaqateqarnermut aningaasaliissuteqartarlersitsisimallutik.
Aleqa Hammondip aningaasaqarnermut inatsisissatut siunnersuutaa talerpiatungaani spaltemi takuuk.