2010-mi akileraarutit nikissanngillat
Kommunitoqqani tallimani kommunit kattunneqarnerat akileraarutitigut suli iluaqutissartaqarpoq.
Kalaallit Nunaanni innuttaasut tamarmik eqqissiallassinnaanngorput: 2010-mi akileraarutit nikissanngillat.
Inatsisartut juunimili akuersissutigaat nunamut tamarmut akileraarut 11 procentiusoq aammalu kommuninut ataatsimut akileraarut 6 procentiusoq nikissanngitsut.
Kommunini nutaani sisamani kommunalbestyrelsit 2010-mut missingersuutit akuersissuteqqammerpaat, kommunillu aningaasarsiornikkut tatineqaraluaqlutik tamarmik kommunimi akileraarut nikisinnianngilaat.
Kommuneqarfik Sermersooq aamma Qeqqata Kommunia 25 procentimik akileraarfiupput, Kommune Kujalleq aamma Qaasuitsup Kommunia 27 procentimik akileraarfiullutik.
Taamaasilluni 2010-mi akileraarutit tamarmiusut imatut isikkoqarput:
Kommune Kujalleq ................. 44 procent
Kommuneqarfik Sermersooq .. 42 procent
Qeqqata Kommunia ................ 42 procent
Qaasuitsup Kommunia............. 44 procent.
1. januar 2009-mi kommunit kattummata Paamiuni, Ammassalimmi, Illoqqortoormiuni, Qasigiannguani Qaanaamilu akileraarutit 2 procentimik appariarput, Qaqortumi, Narsami, Maniitsumi, Aasianni Uummannamilu 1 procentimik appariarlutik, akerlianilli Nanortalimmi Upernavimmilu 1 procentimik qaffariarlutik, Qeqertarsuarmilu 2 procentinik Ivittuunilu 5 procentinik qaffariarlutik.
Tassa 2009-mi akileraarutitigut oqileriaatit qaffariaatillu 2010-mi allanngussanngillat.