2011-mi amigartoorutit amerleriartut
Atuartut ineqarfii pitsaanerit ilinniartunullu inissiat amerlanerit 141 millioner koruuninik akeqarput
Aningaasanut inatsit siorna naatsorsuutigisamit amerlanernik aningaasartuuteqarpoq, taamaattumillu aningaasaqarnermut naalakkersuisoq Maliina Abelsen Inuit Ataqatigiit, ualeru ilassutitut aningaasaliissutissanut inatsimmik 189,6 millioner koruuninik aningaasartalimmik saqqummiussissaaq.
2011-mi aningaasanut inatsit ingerlatsinermi, sanaartukkani taarsigassarsiaritinneqartunilu 200,3 millioner koruuninik amigartooruteqarfiuvoq. 2011-p ingerlanerani ilassutitut aningaasaliissutit 189,6 millioner koruunit Aningaasaqarnermut Akileraartarnermullu Ataatsimiititaliamit akuersissutigineqarput. Taamaalilluni aningaasanut inatsit 2011-mi ataatsimut katillugit 389,9 millioner koruuninik amigartooruteqartussanngorpoq.
Maannali apeqqutaalerpoq 2011-mut nunatta karsiata naatsorsuutai qanoq inerneqassanersut.
Decembarimi ilimanarsigaluarpoq nunatta karsia 160-200 millioner koruuninik immikkut ittumik isertitassasoq uuliasiornermi aatsitassarsiornermilu qaffasissumik ingerlatsisoqarnerata kinguneranik, eqqussuinermut akitsuutini isertitat appariarnerat ilanngaataagaluartoq.
Maliina Abelsen upernaakkut ataatsimiinnermi kingusinnerusukkut nunatta karsiata 2011-mut naatsorsuutaanik saqqummiussissaaq.
Aningaasaliissutit arfinillit
Qaqortumi, Tasiilami, Sisimiuni, Uummannami Aasiannilu ilinniartunut inissianik atuartunullu inissianik sanaartorneq 141 millioner koruuninik ilassutitut aningaasaliisoqarnissaanik pisariaqartitsisimavoq.
Pituffimmi sakkutooqarfiup Thule Air Basep eqqaani Uummannami avatangiisini saliinissaq naalagaaffimmit namminersorlutillu oqartussanit isumaqatigiissutigineqarpoq, tamatumunngalu naalagaaffik 40 millioner koruuninik namminersorlutillu oqartussat 25 millioner koruuninik atuissallutik.
Peqqinnissaqarfik atuinerunermut utaqqisullu ikilisarneqarnerinut marloriarluni ilassutitut aningaasaliiffigineqarpoq katillugit 14 millioner koruuninik aningaasartalinnik.
Inatsisartut siulittaasuata naalakkersuisunullu ilaasortat nutaanik illuliuunneqarnerat 13 millioner koruuninik ilassutitut aningaasaliinermik piumasaqarfiuvoq.
Sinersortaatip »Sarfaq Ittuk«-p angalaannarnissaanut atatillugu umiarsuaatileqatigiiffik Arctic Umiaq Line nunattalu karsia 2010-mi amigartooruteqarnissamut qularnaveeqqusiisoqarnissaanik isumaqatigiissusiorput 6.787.000 koruuninik. Umiarsuaatileqatigiiffiup 2010-mi naatsorsuutai ilimagisamit pitsaanerupput taamaattumillu amigartooruteqarnissamut qularnaveeqqutit tamarmiusut ilaat 3.518.00 koruunit 2011-mi nunatta karsianut utertinneqarsinnaalerlutik.