26-nik ukiulik qimusserluni unamminermi sakkortuumi ajugaavoq

Alaskami qimusserluni 1600 kilomeeterimik isorartutigisumi unamminermi Dallas Seavey-p unammineq ullut arfineq-pingasut, akunnerit 13-t, minutsit sisamat sekundillu 19-it atorpai.

Rekortiliusimasoq minutsini tallimanit sukkanerulluni apuuppoq, qimussimillu sukkaniunneq nunarsuarmi sukkaniunnerni sakkortunerpaatut taaneqartarluni.

26-nik ukiulik Dallas Seavey unammineq taaguuteqartoq Iditarod Trail Sled Dog Race Alaskami ingerlanneqartartoq ukiut pingasut ingerlaneranni aappassaa ajugaavoq. Ataatani 53-nik ukiulik Mitch ukioq kingulleq unamminermi ajugaasimasoq ajugaaffigalugu. Ukioq kingulleq ajugaagami ajugaasimasunit tamanit utoqqaanersaavoq, unammineq 1973-imi aallartinneqarpoq.

- Ataatamma ukioq ataaseq qinngasaartarpaanga ukioq kingulleq ajugaanini pissutigalugu, Seavey katersuussimasunut oqarpoq.

- Ajugaasarnitta takutippaa ajunngitsumik iliortartugut, Seavey ajugaasutut nersorneqareernermi oqarpoq. Nunarsuarmi pitsaanerpaanik suleqatigiillaqqinnerpaanillu qimmeqarluni aamma oqarpoq.

Iditarodi Alaskami unamminerni soqutigineqarnersaat ilaanniippoq, unamminermi 50-it sinneqartut peqataasarlutik, qimmillu 1000-it missaanniittut peqataasarlutik.

Sukkaniunnermi ukioq manna ingerlanneqartumi 69-init peqataaffigineqartumit peqataasut 18-it uniinnartariaqarsimapput. Jeff King sukkaniunnermi sisamariarluni ajugaareersimasoq 40 kilometeriinnarlutik unittariaqarsimavoq anorlerpallaarnera pissutigalugu.

Minutsimut meterimut 65-it tikillugit anorlerpoq, 17-illu 22-villu akornanni issilluni.

Alaskami aqqutit tujorminartut sukkaniunnermi aqqusaarneqarput, qattunerngit qaqqallu arlaqartut aqqusaarneqarlutik, ilaatigullu aamma kuussuit aqqusaarneqartarlutik, sukkaniunnerlu illoqarfimmi Nome-mi naammassineqarpoq.

Ajugaasoq 50.000 dollarsinik akissarsisinneqarpoq, akissarsiassallu 650.000 dollarsit tunniunneqarlutik.

Aliy Zirkle aappaattut inissilluni naammassivoq, ukiut pingasut tulleriisillugit sukkaniunnermi aappaattut inissilluni. Aliy Zirkle arnaavoq, minutsinilu marlunnik kigaannerulluni apuulluni. Sukkaniunnermi kingullermik arnamik ajugaasoqarpoq 1990-ikkunni.

Norskeq Robert Sørlie 55 ukioqartoq tallimassaa peqataavoq sukkaniunnermilu 21-tut inissilluni.