3-nik ukiulik meeqqerivimmiut pissuttuarmata qimataasimasoq: Kommunip malittarisassat erseqqissaassutigai
Pingasunik ukiulik ataasinngornermi Nuummi iliveqarfimmi kisimiittoq nassaarineqarsimavoq. Meeraq meeqqerivimmiunut pisuttuaqataasimasoq, puigorneqarsimasorlu tassani paasinarsivoq. Meeqqap anaanaata pisimasoq akuersaarneqarsinnaannginnerarpaa.
Taamatut kukkusoqarsimanera pisussaasimanngikkaluarpoq, Kommuneqarfik Sermersuumit Nuummi kommunip meeqqerivutaasa ilaanni ataasinngormat pisimasoq pillugu taamatut oqaaseqartoqarpoq.
Sulisut meeqqat pisuttuaqatigisimavaat, angerlamulli apuukkamik meeraq ataaeq amigaataasoq paasisimallugu.
Tassani meeraq pingaunik ukiulik Ilisimatusarfiup akianiittumi iliveqarfiup eqqaani qimanneqarsimavoq sanioqquttullu ilaannit nassaarineqarsimallunie.
Pingasunik ukiullip anaanaata taamatut pisoqarsinnaasimanera narrujuummissutigisimavaa.
- Sulisunit nalunaaqutaq 11.52 sianerfigineqarpunga, tassanilu sulisut ilisimatippaannga meerara pisuttuartoqarnerani qimanneqarsimasoq. Meerara pingasunik ukiulik iliveqarfiup eqqaani kisimiissimavoq. Pisup nalaani sila nillerlunilu anorlerpoq. Meeraq qarlimminut quisimavoq qiulerlunilu.
Annilaarsimallunilu kamattoq
- Soorunami sulit meeqqannik puigungaqarsimanerat kamassutigalugulu nanertissimassutigaara. Tamanna akuersaarneqarsinnaanngilluinnarpoq. Sulisut meeqqanik tamakkiisumik nakkutiginnissinnaannginnerat annilaarutigaara, Andrea Rosbach oqarpoq. Taanna isumaqarpoq, meeqqerivimmi sulisunik amigaateqarneq taamatut alianartumik pisoqarsinnaaneranut pissutaasut ilagisinnaagaat.
Kommuneqarfik Sermersuumi Meeqqanut Atuarfeqarnermullu Ingerlatsivimmi pisortaanerup Lone Nukaara Møllerip oqaatigaa, meeqqerivimmi sulisut pisimasumut aamma sakkortuumik sunnertissimasut:
- Soorunami taamatut kukkusoqarsimanera pisimasussaanngikkaluarpoq. Meeqqerivimmiut pisuttuarneranni qanoq iliortoqartarnissaannut aalajangersimaqqinnaartunik malittarisassaqaraluarpugut.
Ernummatigineqartut pimoorulluinnarlugit tiguneqartut
- Ullumi (marlunngornermi) meeqqamut qimataasimasumut anaanaasoq ataatsimeeqatigaarput, sulisullu pisuttuaqataasimasut inissisimaffiat oqaloqatigiissutigalugu. Sulisut soorunami pisumut annilaarsimaqaat. Meeqqerivimmi pisimasoq pillugu sulisut unnaummut ataatsimeeqatigiissapput, qaammallu ataaseq qaangiuppat malitseqartitsilluta sulisut ataatsimeeqatigeqqissavagut, pisortaaneq ilisimatitsivoq.
Lone Nukaaraq Møllerip ilanngullugu oqaatigaa, kommunimit meeqqeriviit tamarmik pisuttuartarnerannut tunngatillugu malittarisassat erseqqissaassutigineqarniartut:
- Taamatut pisoqarnerani angajoqqaat ernumasarnerat paasisinnaalluarpara. Pisimasoq meeqqamut anaanaasumullu ajorluinnartumik misineqarsimavoq. Ernummateqarnerat pimoorulluinnarlugu tiguarput, taamatullu pisoqaqqinnginnissaa qulakkeerniarlugu sapinngisatsinnik iliuuseqassaagut. Taamaliussaagut manna pisimasoq iliuuseqarfiginiarlugu aamma meeqqeriviutitsinni tamani malittarisassat eqqortut erseqqissaassutigalugit, pisortaaneq oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...