32-nik ukiulik pinerliiniartutut unnerluutigineqartoq: Løkke Støjbergilu sioorasaarsimavai

Omar el-Hussein ´nunapalaamik massuminnga pinerliiniaqattaartarnissani aallarniutaannaavoq´.

Allagaq unnerluussut naapertorlugu angutip 32-nik ukiullip ministeriuneq Lars Løkke Rasmussen (V) nunanilu allamiunut ministeri Inger Støjberg (V) taamatut sioorasaarpai, juunimi folketingimut qinersinerup kingorna ullualunnguit qaangiuttut.

Aallaasersorluni toqutsisoq

Omar el-Hussein tassaavoq siorna februaarimi Københavnimi aallaasersorluni pinerliisutut oqaatigineqartoq. Taassuma inuit marluk toquppai, nammineq politiinit aallaaneqarluni toqutaannginnermini.

Angut 32-nik ukiulik pinerliiniarnissamik sioorasaarisutut pinngitsuunerarpoq, eqqartuunneqarneralu ataasinngorpat aallartinneqassaaq.

Siullermeersuunngilaq angutip taassuma pinerliinissamik sioorasaarisutut unnerluutigineqarnera.

E-mailikkut nassitsivoq

Politikerinut Venstremeersunut marlunnut sioorasaarinerit e-mailikkut nassiunneqarsimapput, angutip 32-nik ukiullip paarineqarluni parnaarussaaqqanerani, tamatumunngalu pissutaasimavoq Facebookikkut allanik arlalinnik sioorasaaaruteqartarsimanera.

Profilimini ilaatigut allassimavoq:

– Misigissuseqanngilluinnarpunga, aaqqiissutissatuaavoq ajortumeerinerit, killiligaanngitsumik oqaaseqarsinnaanermik taaneqartartup nakkutigineqalernissaata tungaanut, aamma:

– Pinerliinissaq pisussaaffiuvoq.

Tarnikkut nappaatilinnut immikkoortoqarfimmut

Unnerluussisup Anders Larssonip piumasaraa angut piffissaa aalajangernagu tarnikkut nappaatillit immikkoortoqarfiannut inissinneqassasoq - kiisalu Danmarkimit anisitaassasoq iseqqeqqusaajunnaavilluni, 32-nik ukiulik qaquguussagaluarnersoq ajorunnaassagaluarpat.

Eqqartuussineq Frederiksbergip Eqqartuussiviani ingerlanneqassaaq, ullullu tallimat eqqartuussinermut atugassaritinneqarallarput.

Ilisimannittut

Illersuisup Peter Hjørnep piumasaraa Lars Løkke Rasmussen aamma Inger Støjberg suliap ingerlanneqarnerani ilisimannittutut qaaqquneqassasut, taamatut allappoq Ekstra Bladet.

– Lars Løkkemi Inger Støjbergilu eqqunngitsuiorfigineqartuupput, taamaattumik pissusissamisoorluinnassaaq ilisimannittutut qaaqquneqarnissaat, tamannali statsadvokatip akerleraa, isumaqarluni taamatut uppernarsaatissarsiornissaq pisariaqanngitsoq, Peter Hjørne Ekstra Bladetimut oqarpoq.

Akerliliivoq

Unnerluussisup Anders Larssonip tunngavissaqartinngilaa taakkua marluk ilisimannittutut qaaqquneqarnissaat, taamaattumillu tamatumunnga akerliliilluni.

– Pisimasumi pineqanngilaq taakkununnga marlunnut (Løkkemut Støjbergimullu, aaqqiss.) sioorasaarinerit - akerlianik pineqarpoq pinerliinissamik sioorasaarinerit.

– Taamaattumik isumaga malillugu taakkua qisuariaataat eqqartuussiviup isummerfigisassarinngilaa, Anders Larsson oqarpoq.

Frederiksbergimi Eqqartuussiviup isummerfigissavaa illersuisup politikerit pineqartut taakkua marluk ilisimannittutut qaaqqusinnaanerai.

/ritzau/