32-nik ukiulik toqutseriarsimasutut ikuallatsitsisimasutullu unnerluutigineqarpoq
Angut 32-nik ukiulik inissiamik ikuallatsitsisimasutut pisimasumilu tassani arnamik toqutseriarsimasutut unnerluutigineqarpoq. Danmarkimi tarnikkut nappaatillit napparsimmaviannut inissinneqarnissaa unnerluussisup piumasaraa.
Toqutseriaraluarneq ikuallatsitsinerlu pillugit suliaq ulluni marlunni Sermersuup Eqqartuussiviani suliarineqassaaq. Sisamanngornermi marsip arfineq-aappaani tallimanngornermilu marsip arfineq-pingajuani tamanna pissaaq.
Angut 32-nik ukiulik ikuallatsitsisimasutut arnamillu toqutseriarsimasutut unnerluutigineqarpoq.
Unnerluussut naapertorlugu 2023-mi apriilip 27-ani angutip angerlarsimaffiani pisoq pivoq. Tassani angutip atisat, atuakkat spillillu ineeqqamini ikuallassimavai, kingornalu arnaq ineeqqamut eqqunniarsarisimallugu.
Tamatuma kingorna arnaq angummit aniguisimavoq ikiortissarsiorsimallunilu.
Inissinneqarnissaa piumasarineqartoq
- Tamatuma kingorna unnerluutigineqartup matu parnaarsimavaa, inissiamilu sumiiffinni allani atortorissaarutinik arlalinnik ikitsilluni, tamatumalu kingunerisaanik sakkortuumik ikuallattoqalerpoq pujorsuaalerlunilu, taamaalillunilu (...) inissiamilu najugaqartut allat inuunerat navianartorsiortinneqarluni,“ unnerluussummi allassimavoq.
Angut nunatsinni tarnikkut nappaatilinnut napparsimmavimmi katsorsarneqassasoq, imaluunniit napparsimmavimmit nakkutigineqassasoq, aniguisinneqarnermilu kingorna pinerluttunik isumaginnittoqarfimmit nakkutigineqassasoq, unnerluussut naapertorlugu unnerluussisup piumasaraa.
- Aammattaaq ’piffissaq sivisunerpaamik pineqaatissiinissamut aalajangersagaqanngitsoq’ oqaatigineqarpoq.