320-t ukiumi nutaami tunillatsissimasut
Nuummi januaarip aappaani misissuisoqarmat 158-it tunnillatsissimasut nutaat takutippaat, illoqarfiit pingaarnersaanni tuniluuttoqangaatsiartoq, nunatsinnni nakorsaaneq tunillatsissimasut amerlassusaannik ullormi nutarterisoqarnerani erseqqissaavoq. Naalakkersuisut taamatut inissisimasoqarnera pillugu tusagassiortut marlunngornermi aggersarpaat.
Ukiutoqqami kingullermi nutarterisoqarnerata kingorna nunami maani tunillatsissimasut nutaat 320-t nassaarineqarsimapput. Taamaalilluni inuit tunillatseqqasut 604-nngorsimapput.
Ullormut tunillatsissimasut amerlassusaannik tamanut saqqummiussioqarsimatsiartoq, Naalakkersuisut coronamut atatillugu inissisimaffik pillugu tusagassiortunik aggersaanerat saqqummiunneqarpoq.
Tusagassiortunik katersortitsineq marlunngornermi januaarip sisamaani nalunaaqutaq marlunut aallartinneqassaaq, coronallu Kalaallit Nunaanni killiffianut tunngassuteqassalluni.
Misissortissimasut 20 procentii tunillatsissimasut
Misissugassatut tiguneqarsimasut ilaat akissutisineqarsimasut, kingullermik ulloq 31. december 2021 sioqqullugu misissugassatut tiguneqarsimapput, taamanikkulli misissoqqissaarneqarsimanatik, Nunatsinni Nakorsaaneqarfik nun.gl-ikkut ilisimatitsivoq.
Tunillatsissimasut amerlanerpaartaat Nuummi ulloq 2. januar 2021 misissuinermi nassaarineqarput. Inuit misissorneqarsimasut 757-iusut akoranni tunillatsissimasut 158-it nassaarineqarput. Tassa misissorneqartut 20.9%-ii tunillatsissimallutik.
- Tamatuma erseqqissumik takutippaa, Nuummi sukkasuumik tuniluuttoqartoq, nunatsinni nakorsaaneq allappoq.
Misissugassatulli tiguneqarsimasut, nunamili maani Omikroni tuniluuunnersoq pillugu uppernarsaataasinnaasut akissutaat suli takkutinngillat. Taamaattoq Ittoqqortoormiini, Kangerlussuarmi Nuummilu tuniluuttoqarnerata erseqqissumik takutippaa, siusinnerusukkut takusimanngisatsitut sukkanerujussuarmik tuniluuttoqartoq.
Sumiiffinni arlalinni tuniluuttoqangaatsiartoq
Malitseqartitsilluni misissuinermi Ittoqqortoormiini allanik tunillatsissimasunik nassaartoqarsimavoq. PCR atorlugu misissukkat 14-it Nuummi misissoqqissaagassanngorlugit nassiunneqarsimapput, taakkunannga qulingiluat tunillatsittoqarsimaneranik takutitsillutik. Aamma akiuussutissalerneqarsimasut 65-it misissortissimapput, taakkunannga 20-t tunillatsissimallutik. Misissugassat amerlanerit Nuumi laboratooriami misissugassanngorlugit nassiunneqarsimapput.
- Peqqissaasoq ataaseq aamma Ittoqqortoormiinukartinneqarpoq. Tassani napparsimasunik naliliinissap katsorsartariaqartunillu isumaginninnissap pisariaqartinneqartumik upalungaarsimaffigineqarnissaata qulakkeerneqarnissaa siunertaralugu, nunatsinni nakorsaaneqarfik ilisimatitsivoq.
Ulloq 30. december 2021 Qeqertarsuatsiaani malitseqartitsisumik misissuisoqarpoq, tassani aallanik tunillatsittoqarsimanera paasineqarluni.
Aamma Kangerlussuarmi malitseqartitsisumik misissuisoqarsimavoq. Tassanilu tunillatsissimasut allat nutaat nassaarineqarlutik.
Coronamut akiuiniarnermi sulineq allanngortinneqarniartoq
Maannakkorpiaq marluk uninngapput, taakku marluullutik Nuummi uninngallutik.
Sukkasuupilussuarmik tuniluuttoqarnera pissutigalugu Coronamik Akiuinermi peqqinnissaqarfimmilu sulineq allanngortinnisarlugu sulissuteqartoqarpoq. Tassani qulakkeerniarlugu, tunillatsissimasut tamarmik piaarnerpaamik ilisimatinneqartarnissaat kiisalu peqqinnissaqarfiup tunillatsissimasut amerliartuinnartut naliliffigisarnissanissaanut katsorsarneqartarnissaanullu pisareersimasarnissaa qulakkeerniarlugu.
Kingullermik tunillatsissimasut amerlassusaat nutarternerqarput ukiutoqqami, tassani tunillatsissimasut 115-iullutik, taakkunannga qulit Nuummi, qulingiluat Kangerlussuarmi, pingasut Ilulissani ataaserlu Aasianni nassaarineqarlutik.