§37-mut akissut: Siusinaartumik pensionisiallit pillarneqarneq ajortut
Siusinaartumik pensionisiaqartitsisarnerup aaqqissuuteqqinneqarneranik nalilersuinermi paasinarsivoq, siusinaartumik pensionisiallit aningaasanik nammineq atugassanik peqartussaanermik malinninngitsut pillugit kommunit pineqaatissiinissamut periarfissamik atuineq ajortut.
Simigaq Heilmannip Demokraatineersup paragraf 37 naapertorlugu apeqqutaanit Suliffeqarnermut Naalakkersuisup Jess Svanep akissutaani atuarneqarsinnaavoq, Isumaginninnermut Inatsisinillu Atuutsitsinermut Naalakkersuisoqarfiup siusinaartumik pensionisiaqartitsisarnerup aaqqissuuteqqinneqarsimaneranik nalilersuisimaneq qanittukkut saqqummiunniaraa.
Jess Svane aalajangersimavoq Isumaginninnermut Naalakkersuisoqarfiup nalilersuinermini sunik paasisaqarsimaneranik saqqummiussiniarluni.
- Nalilersuinermit nalunaarusiami atuarneqarsinnaavoq, siusinaartumik pensionisiallit aamma siusinaartumik pensionisiallit pisortat ikiorsiissutaannik qinnuteqarsimasut pillugit kommunit pineqaatissiinissamut periarfissamik pisussaaffigisaminnik atuineq ajortut, Jens Svane allappoq.
Ilisimasaqannginneq
Ajornartorsiut qanoq annertutiginersoq ilisimaneqanngitsoq, allakkani erseqqissaassutigineqarpoq.
- Kisitsisitigut paasissutissaqanngimmat ajornartorsiut qanoq annertutiginersoq oqaatigineqarsinnaanngilaq. Aamma siusinaartumik pensionisiaqalernissamik qinnuteqartut qanoq amerltigisut pisortat ikiorsiissutaannik pisartaqarnersut oqaatigineqarsinnaanngilaq.
Jess Svanep akissummini aamma innersuussutigivaa ”qanoq ililluta qulakkeersinnaaneripput, innuttaasut sulisinnaasut arlaannaalluunniit inuiaqatigiinnut tunniussaqaratik pisortat ikiorsiissutaannik pisartagaqannginnissaat”.