40-nik ukiulik ikiaroornartunik eqqussinermut qaammatini qulingiluani ingerlaannaq pineqaatissinneqarpoq
Angut 40-nik ukiulik hashimik aamma amfetaminimik Danmarkimit Kalaallit Nunaannut eqqussisimasutut, pingasunngormat qaammatini qulingiluani pineqaatissinneqarsimasunut inissiisarfimmiittussanngorlugu ingerlaanneq pineqaatissinneqarpoq.
Marlunngornermi sapaatip-akunnerani matumani Ilulissani ilanngaaserisut angummik 40-nik ukiulimmik Danmarkimeersumik unitsitaqarput. Angutip kuffertiani ilanngaaserisut hashimik 500 gramit aamma amfetamininik 40 gramit missaanniittunik nassaarput.
Angut tigusarineqarpoq, Ilulissanilu isertitsivimmut inissinneqarpoq, inatsit tunngaviusoq malillugu killisiorneqarnissani sioqqutilaarlugu angut nassuerniarluni aalajangerpoq. Kalaallit Nunaanni Politiit tusagassiuutinut nalunaarummi allapput.
Nassueruteqarnera pissutigalugu suliaq ingerlaannaq pineqaatissiinermik aalajangerneqarsinnaasimavoq, Eqqartuussiveqarfik Qaasuitsullu angut qaammatini qulingiluani pineqaatissinneqarsimasunut inissiisarfianniittussanngorlugu pineqaatissippaa.
Kalaallit Nunaanni Politiini unnerluussisussaatitaasuni immikkut unnerluussisoq, Martin Strandby Nielsen, suliaq pillugu oqaaseqarpoq:
Unnerluussisoq: Illuatungeriit tamarmiusut piffissamik sipaartinneqartut
- Angut aallaqqaammut nassuerutiginninngimmat, tigummigallarneqarnissaa anguniarparput, taamaalilluni suliamik misissuinitsinni pinerloqataasimasinnaasut sunnerniarsinnaassanngimmagit, Martin Strandby Nielsen nassuiaavoq, nangillunilu:
- Ingerlaneranili nassuerniarluni aalajangerpoq, Kalaallit Nunaannilu nassueruteqarnermik suliat ingerlanneqarnissaat periarfissaammat, angutip ilanngaaserisunit tiguneqarneranit ullup unnuallu ataatsip missaata ingerlanerani ingerlaannaq pineqaatissiissuteqarpugut. Soorunami tamanna naammagisimaaqaara, nassueruteqarnermillu suliat naleqarnerinik takutitsivoq, suliami illuatungeriinnut tamanut sivisuumik suliarinninnissaraluamik sipaartoqarmat.
Angutip pineqaatissiissut akueraa.
Arnap hashimik 1,4 kg-mik eqqussineranut atatillugu qaammatini tallimani pineqaatissinneqarsimasunut inissiisarfimmiittussatut pineqaatissinneqarnerata kingorna, qaammat ataaseq missaa qaangiuttoq Ilulissani ingerlaannaq pineqaatissiineq pivoq.