50-it sinnerlugit ukiulinnut peqqissutsimik misissortittarneq
50-it sinnerlugit ukiullit ukiumoortumik peqqissutsimik misissorneqarnissamik neqeroorfigineqartartuuppata,perulunnartumik napparsimanerit ikilisinneqarsinnaasut, Erik Olsenip takorloorpaa. Nammineq anaanamisutkræfteqalersinnaanini ernumassutigisimavaa.
- Inuit nakorsiarnissamut kingusinaartartut tusartuartapagut. Kingullermik angut utoqqaq nakorsiartoq nakasuup paavani qinersimigut kræfteqartoq paasineqartoq tusarpara. Sivisuumik napparsimasimagunarpoq, kisianni kingusinaareersoq aatsaat malugisaqalersimavoq.
Erik Olsen taama oqaluttuarpoq.
Taanna 53-inik ukioqarpoq, peqqissumik timersornertalimmik inuuneqarpoq. Kisianni nammineq peqqissutsiminut tunngatillugu saniatigut amigaateqartutut misigisimavoq; nakorsamit peqqissutsimik misissorneqarneq.
Peqqissutsimik misissorneqartarnissaq Kalaallit Nunaanni 50-it sinnerlugit ukiulinnut tamanut kissaatigaa. Kikkunnut tamanut kissaatiginnittunut neqeroorutitut.
Aaversinnikkut annertuumik takusaqartoqarsinnaasoq takorloorpaa, kisianni aamma timi tamakkerlugu misissuisoqarsinnaanera takorusukkaluarpaa, taamaalilluni nappaatit perulunnartuusinnaasut anniarnertaqartuaannanngitsut paasineqartassammata.
Nappaatinik allanik kræftiinnaanngitsumik peqarpoq, kisianni Kalaallit Nunaanni inuppassuit kræftimik eqqugaasartut, Erik Olsenip oqaatigaa.
- Uanga aamma nammineq ernumassuteqarpunga. Anaanaga kræfterluni toqunikuuvoq, kræftialu kingornuttagaanersoq, uannut nukkannullu ingerlateqqissimasinnaaneraa ilisimanngilarput, taanna oqarpoq, tassungalu atatillugu peqqinnissaqarfimmit paasititsiniaasoqarnerusinnaaneranik ujartuilluni ilanngullugu oqaatigaa.
- Anaanama kræfteqarnera kingumut eqqarsaatigigaangakku, napparsimmavimmi kræfteqarneq pillugu paasissutissalinnik pappiaraqarpoq. Kisianni tassaniiginnarput, namminerlu immikkoortortaqarfimmiinngikkaanni pappiaqqat takuneqarsinnaanngillat, taamaalillutillu maangaannartinneqartarput, taanna oqarpoq.
- Nappaatit peruluutaasinnaasut pillugit innuttaasut ilisimatissagutsigit – paasissutissat amerlannginnersut imaluunniit amerlanersut apeqqutaatinnagu – paasissutissat taakku pissarsiariuminarnerussapput, taanna oqarpoq.
