63-inik ukiulik politiinit ujaarineqartoq: Nammineq kajumissutsimik ujaaseqataasussat naapilersut

Sisimiuni angut 63-inik ukiulik ujaarineqartoq, Kalaallit Nunaanni Politiit ataasinngornermi unnukkut Facebookimi allapput.

Angut 63-inik ukiulik kingullermik takuneqarpoq pingasunngornermi januaarip 24-anni nal. 10.43 missaani napparsimmavimmit anigami.

Angut 170-175 centimeterisut angitigisutut, tuattutut, aappalaartunillu naatsunik nujalittut allaatigineqarpoq, qernertumillu naatsumik kavaajaqarluni, qarleqarluni napparsimmavimmilu atisanik atisaqarluni.

Nammineq kajumissutsimik ujaaseqataasussat unnugu naapinniartut

Karl-Jørgen Enoksen Sisimiuni innuttaasunik nammineq kajumissutsiminnik ujaaseqataarusuttunut naapeqatiginnikkumalluni Facebookikkut allagaqarpoq.

- Naluneqanngitsutut nunaqqatinnguarput ujaarineqarpoq. Issitsigisoq iliuseqapallannissaq pingaaruteqarsinnaavoq, ujaaseqataarusuttut unnugu nal. 19.30 utoqqaat naapittarfianni Inneruulani naapilerpugut. Nalunngilara massakkut susassaqartut ujaasisut, kisianni aamma taakkuinnaat isumalluutiginngikkaluarlugit annertoqqutaasinnaavugut ujaaseqataalluta

Inersimasut kisimik ujaaseqataassapput

Ujaasineq sakkortusinnaammat inersimasut kisimik ujaaseqataanissaat kaammattuutigaa.

- Ujaasineq imaannaaneq ajorpoq, taamaammat inersimasut imaluunniimmi qamuuna piareersimasut taakkuunerussapput ujaasisinnaasut. Soorunami meeqqat akuunavianngillat inuusuttuaqqallu ujaasineq imaannaanngissinnaammat, Karl-Jørgen Enoksen, ujaaseqataanissami siuttuusoq Facebookimini taama allappoq.

Sisimiuni innuttaasut kajumissaarneqarput quitik, naqqup atai, toqqorsivitik suliffiitillu misissoqqullugit.

Angut sumiinnersoq ilisimagaanni imaluunniit januaarip 26-ata kingorna takuneqarsimappat politiinut saaffiginnittoqarsinnaavoq oqarasuaat 70 14 48 atorlugu, politiit allapput.

Pigaartut pisortaata Preben Kleistip marlunngornermi ullaakkut nalunaarutigaa ujaasineq suli ingerlasoq, angullu suli maqaasineqartoq.