71-inik ukiulik kalaallimik sakkutuumik aporsilluni toqutsisimasutut eqqartuussivimmut sassartinneqarpoq
71-inik ukiullip kalaaleq sakkutooq oktoberimi Timmisartoqarfiup Karup eqqaani biilinik aporlugu toquppaa. Angut pineqartoq ullumi Viborgip eqqartuussiviani eqqartuunneqassaaq.
Angut 22-nik ukiulik Aasianneersoq, siorna oktoberip arfineq-aappaanni Timmisartoqarfiup Karupip eqqaani biilertumit aporneqarluni toqutaavoq.
Pisuinnaat ikaartarfianni aporsineq pisimavoq, aporsisorlu qimaasimalluni. Politiit sapaatip akunnera qaangiuttoq angut 71-inik ukiulik tigusaraat, taannalu maanna inummik toqutsisimasutut unnerluunneqarluni.
Angut ilaatigut pisuussuteqarnerarpoq, nassuiaatigaluguli isumaqarsimalluni oqinninnguamik aporsilluni.
Pisuussuteqannginnerartoq
Angut Viborgip Eqqartuussiviani ullumi sisamanngornermi eqqartuunneqarpoq, tassanilu nassuiaatini aalajangiussimavaa, Viborg Stifts Folkeblad allappoq.
- Isumaqaavillunga inuunngitsoq. Inuit inuinnaat ikaartarfiatigooraangamik imminnut paarisarput. Isumaqaavippunga oqinninnguamik aporsisimalluna. Biilimma saavanut periasaartoq inuusinnaanngilaq, Viborg Stifts Folkeblad naapertorlugu angut eqqartuussivimmi taamatut oqarpoq.
Mianersuaalliorluni toqutsisimasutut suli pisuussuteqannginnerarpoq.
Viborg Stifts Folkeblad naapertorlugu suliami takunnissimasutut pingaarutilik takkutinngitsoorsimavoq, taamaammallu eqqartuussinissaq kingusinnerusumut nuunneqarsimasoq, tassanilu pineqaatissiisoqarnissaa naatsorsuutigineqarluni.