7,7 milliuunit koruunit pillugit ukiuni pingasuni pineqaatissinneqassasoq
Angut 48-nik ukiulik hashimik katillugit 16,5 kilomik tigummiaqarsimasutut tuniniaasimasutullu eqqartuunneqarami ukiuni pingasuni pineqaatissinneqarsimasunut inissiisarfimmiittussanngortinneqarpoq. Suliaq Kujataani Eqqartuussiviup suliaraa.
Angut 48-nik ukiulik hashimik katillugit 16,5 kilomik tigummiarsimasutut tuniniaasimasutullu unnerluutigineqarami, ukiuni pingasuni pineqaatissinneqarsimasunut inissiisarfimmiittussanngorlugu eqqartuunneqarpoq. Angut alla, 39-nik ukiulik, ikiaroornartunik assartuisimasutut unnerluunneqarami, pinerluuteqaqqissaguni qaammatini sisamani pineqaatissinneqarsimasunut inissiisarfimmiittussanngortinneqarluni eqqartuunneqarpoq.
Nordjyske.dk taama allappoq.
Hash pillugu suliaq annertooq paasineqarpoq Aalborgimi nunatsinnut assartungassanik talittarfimmi ilanngaaserisut, assartukkani qerisut akornanni 7,7, milliuunit koruuninik siorna nassaarmata. Aningaasat naatsorsorneqarsimapput hashimit 6,5 kilomit isertitaasimassasut.
Ilanngaaserisut aqutsisoqarfiat ilisimatitsivoq aningaasarpassuit qerisut akornanni toqqoqqalluarsimasut.
Suliami inuit marluk tigummigallarneqarsimapput, suliarlu maanna Kujataani eqqartuussivimmi naammassineqaqqammerpoq.
Nordjyske.dk allappoq aningaasarpassuit biilinut nalunaaquttanullu passimmiunut akisuunut atorneqarsimasut.
Eqqartuussiviup aalajangiinera angutip 48-nik ukiullip nunatta eqqartuussivianut ingerlaannarluni suliassanngortippaa. Unnerluussisussaatitaasup suliami aalajangiinerup sakkortunerulersinneqarnissaa pillugu aamma nunatta eqqartuussivianut suliassanngortitsivoq.
