80 procentit ukiut arfineq-marluk iluanni aallaqqipput
Sulisussanik amigaateqarneq atugaavoq, kisianni sulisut tikisitat piffissami sivisuumi sulisoriinnarnissaat iluatsinneqarsinnaassappat, Aningaasaqarnermut Siunnersuisoqatigiit periarfissarujussuarmik peqarnerarpaat.
Sulisussaaleqinerup nunatsinni aningaasaqarnikkut siuariartorneq killilersorsinnaavaa, sulisinnaasut qanoq amerlineqarsinnaanersut Aningaasaqarnermut Siunnersuisoqatigiit misissueqqissaarnerminni qanittukkut saqqummiussaminni periutsinik arlalinnik oqariartuuteqarput.
Ilaatigut soraarninngornissamut ukiut qaffanneqarnissaannut, Aalisarneq pillugu Ataatsimiititaliarsup innersuussutaanik suliniutinik ingerlataqarnermut kiisalu minnerunngitsumik sulisut tikisitat ukkatarineqarnerannut tunngapput.
Sulisut tikisitat sivisunerusumik sulisorineqarnissaannut periarfissamik annertuumik peqartoq Aningaasaqarnermut Siunnersuisoqatigiit oqaatigaat.
Sulisut 500-600-nik amerleriartinneqarsinnaasut
- Nunamut nuuttut nutaat pingajorarterutaat ukiumi siullermi utertarput, taamaallaallu 20 %-ii ukiut arfineq marluk qaangiunneranni utertarlutik.
- Kalaallit Nunaanniinneq assersuutigalugu ukiumik ataatsimik sivitsoraanni, sulisut inunnik 500-600-nik amerlineqassapput (ukiumi ataatsimi nunamut nuuttartut amerlaqataat), siunnersuisoqatigiit misissueqqissaarnerminni allapput.
Nunani amerlasuuni sulisinnaasut ikiartornerat pissutigalugu, piffissaq ungasinnerusoq eqqarsaatigalugu nunanit allanit sulisussarsiorneq ajornarneruleriartorsinnaasoq, siunnersuisoqatigiit maluginiaqquaat.
- Sulisut unammillissutigineqarnerisa akissarsiat (atugassaritinneqartulluunniit allat) pillugit piumasaqaatit annertusisissavai, aamma sulisut nunamit namminermeersut akissarsiaannut sulinermilu atugassarisaannut tunngatillugu akerleritsitsilersinnaalluni, siunnersuisoqatigiit misissueqqissaarnerminni allapput.
Amerlavallaartut aalisarput
Aningaasaqarneq eqqarsaatigalugu pisat nungusaataanngitsumik annertussuseqarnissaannut sanilliullugu aalisarnermi amerlasuut sulisorineqartut, Aningaasaqarnermut Siunnersuisoqatigiit misissueqqissaarnerminni oqariartuut uteqqippaat.
Aalisarnermi sulisorineqartut ikilisarneqassappata, sulisut allani atorneqarsinnaapput, Aningaasaqarnermut Siunnersuisoqatigiit siulittaasuat, Torben M. Andersen nassuiaavoq:
- Sulisussat ilaannik katatsitsisoqarsinnaavoq, aalisarnermik suliaqartut amerlasuut suliassaqarfinni allani siornatigut sulereersimasut siorna nalunaarusiami aamma takuarput. Taamaattumik taakku ilaat suliaminnik allanngortitsisinnaanerat piviusorsiortuusinnaavoq, tamatumalu peqatigisaanik Aalisarneq pillugu Ataatsimiititaliarsuarmit siunnersuutit peqatigisaannik aalisarnermi sulisorineqartut aamma inuiaqatigiinnut tunngatillugu pissarsiffigilluarneqarnissaannut iluaqutaassapput, Torben M. Andersen, Sermitsiaq.AG-mut oqarpoq.
.Allannguineq piffissami sivisuumi ingerlanneqartussaasoq, kisiannili aallartinnissaq ataatsimullu isigalugu sulisussaaleqinerup allannguinerup ajornannginnerulersitsinnissaanik atuinissaq pingaarnerupput, siunnersuisoqatigiit oqariartuuteqarput.
Soraarninngornissamut ukiut qaffanneqarnerisa sunniutaat annertooq
Sulisinnaasut amerlineqarnissaanut suliniuteqarfissat pingajuat tassaavoq soraarninngornissamut ukiut qaffanneqarnerat. Soraarninngornissamut ukiut 65-init 67-inut qaffanneqarnerat sunniuteqareersimasoq, siunnersuisoqatigiit tassani oqaatigaat:
- Soraarninngornissamut ukiut amerliartortinnerat suliffeqarnermut pisortallu aningaasaqarnerannut pingaarutilimmik tapersiissaaq.
- Soraarninngornissamut ukiut qaffasinnerusut suliffeqarnermut annertuumik sunniuteqarpoq, assigalugit inuit 125-init 150-inut, Aningaasaqarnermut Siunnersuisoqatigiit allapput.