Illersornissamut siumalioqatigiissitap siunnersuutigilersaarpaa umiarsuit nakkutilliissutit Knud Rasmussenitut ittut pingajussaat sananeqassasoq umiarsuaararlu nakkutilliissut »Tulugaq« taarserlugu, nordjyske.dk allappoq.

Sakkutuut umiartortut 1. eskadre-anni Frederikshavnimi qullersaqarfeqartumi Illersornissamut Isumalioqatigiissitap kaammattuutai eskadrep naalagaanit kommandør Jens Waltherimit ilassilluarneqarput.

- Isumaqarpunga silatusaarnerusoq, ilaatigut ajornartorsiut issittumut tunngasoq annertuumik tapersersorneqartoq nalunaarusiap takutimmagu, Jens oqarpoq.

Kalaallit Nunaata eqqaani oqartuussaaffimmik nakkutilliineq, avatangiisini annaassiniartarnermillu suliat 1 eskdrep oqartussaaffiiniipput, tassanilu silaannaap pissusaata allanngoriartorneri umiarsuakkullu angallannerit amerliartornissaat pissutigalugit siunissami suliassat annertusinissaat nalornissutigineqanngilaq.

Taamaattumik eskadrep naalagaata nuannaarutigaa isumalioqatigiissitaliap Atlantikup avannaani umiarsuaaqqat nakkutilliissutit kingullersaat umiarsuarmik nakkulittiissummik taarserneqarnissaat kaammattuutigimmagu. Sakkutuut umiartortut ullumikkut umiarsuarnik nakkutilliissutit taamaattut pigaat, Sakgenimi Karstensens Skibsværft-imi sananeqarsimasut.

- Umiarsuit taakku suliassamut piukkunnarluinnartuusut paasineqareerpoq. Pisinnaanerupput, sikumik annertunermik aserorterisinnaallutik silarluttumilu angalasinnaallutik. Imaappoq tunumi aamma nakkutilliisalersinnaanissatsinnut periarfissagissaarnerulissasugut, Jens Walther oqarpoq.

Taassumali erseqqissarpaa umiarsuaq nakkutilliissut taartaaginnarmat, aammalu umiarsuaq nutaat peqqutigalugu sakkutuut umiartortut soorlu ukiut 50-it matuma siornagornit umiarsuaqarnerulernavianngitsoq.

- Piffissaq sivikinnerusoq eqqarsaatigalugu ajunngilaq, kisianni suliassat amerliartortillugit piffissaq sivisunerusoq eqqarsaatigalugu naammannavianngillat, Jens Walther oqarpoq. Taamaattumik taassuma aamma pissangagaa Illersornissamut Isumalioqatigiissitaliap Kalaallit Nunaanni eqqaanilu nakkutilliinerup annertusarneqarsinnaanerannut periarfissanik misissuinissamik kaammattuuteqarnera qanorpiaq imaqarumaarnersoq.