Kalaallit Peqatigiiffiisa Kattuffiata »Inuit« naammaginngilaat Namminersornerullutik Oqartussat kalaallit peqatigiiffiinut tapiissutinik ilanngarterisimanerat. Tamatuma kinguneraa nunaqqatitsinnik ikiuinissatsinnik periarfissatta killilerneqara, kattuffik isumaqarpoq.
Kalaallit Peqatigiiffiisa Kattuffiat Inuit Namminersornerullutik Oqartussanut allakkanik ammasunik allagaqarput. Naammaginngilaat namminersornerusut ukiumi kingullermi tapiissutit atorneqarnissaannut piumasaqaatit allanngortimmatigik, tamatuma kinguneranik peqatigiiffinnut nalinginnaasumik tapiissuteqartarneq atorunnaarpoq. Namminersornerusunit peqatigiiffinnut tapiissutaasartut 300.000 koruuniniit 250.000 koruuninut apparput.
- Nalinginnaasumik peqatigiiffinnut tapiissutit pisariaqarput peqatigiiffiit ingerlatissagaanni. Piviusut maanna imaapput kalaallit amerligaluttuinnartut Danmarkimut nuuttarmata, attaveqartarnissaminnullu periarfissaqassappata taava pingaaruteqartorujussuuvoq peqatigiiffiit Kattuffimminnit tapiiffigineqartarnissaat, Kalaallit Peqatigiiffiisa Kattuffiat Inuit Namminersornerusunut taama allappoq.
Procentinngorlugu tamanna isumaqarpoq Danmarkimi peqatigiiffinnut aningaasat 16,6 procentimik appariartinneqartut taamatut Namminersornerusut tapiissuteqartarnerisa allanngortinneqarneranni. Peqatigiiffiit Danmarkimi kalaallinik sullissinerat akornuserneqarpoq.
- Tapiissuteqartartut kattuffimmut peqatigiiffinnik ilaasortaminik sullissinissaanutt piumasaqaatit ima sukaterneqartigilersimapput eqartigilerisimallutik, allaat suliassap suliarinissaa ajornakusuulerluni. Taamaalilluni allaat Kalaallit Peqatigiiffiisa Kattuffiat Inuit peqquneqarsimalluni peqatigiiffinnut ilaasortaminut tapiissuteqartarunnaassasoq, Kalaallit Peqatigiiffiisa Kattuffiat Inuit allappoq.