Aaja Chemnitz: Isumaqatigiinniarnerit ilungerunartussaapput
Annerusumik nakkutilliisoqarnissaa, attaveqaasersuutit eqqorneqarsinnaasut illersorneqarnissaat siunertaralugu aamma Kangerlussuup qanoq pineqarnissaanik paasitinneqarnissaq, taakku tassaapput IA-p Danmarkimi naalakkersuisunut illersornissaq pillugu isumaqatigiinniarnissat sioqqullugit, pingaarnersiuilluni allattugaanni siullertut inissinneqarsimasut.
Illersornissamut isumaqatigiissutissaq pillugu politikikkut isumaqatigiinniarnerit, illersornissamut ministeriugallartoq Troels Lund Poulsen aqutsisoralugu maajimi aallartinneqassapput. Inuit Ataqatigiit kalaallit pingaarnersiugaannik saqqummiussinissaminnut piareersimasut, Aaja Chemnitzip oqaatigaa.
Aviisi Sermitsiaq taama allappoq.
Illersornissamut isumaqatigiissutissap suliarinerani aallarniutaasut, piffissami matumani aallartinneqareersimalerput. Juuni naatinnagu, 2033-p tungaanut atuuttussamik, politikikkut isumaqatigiissusiortoqarnissaa naatsorsuutigineqarpoq.
– Illersornissamut ministerip ataatsimiititsineranut Folketingimut ilaasortat Atlantikup avannaaneersut allat pingasut peqatigalugit ataatsimeeqataavunga. Paasitinneqarpugullu illersornissamut oqartussat aningaasaqarnerat apriilimi misissuiffigineqassasoq taavalu isumaqatigiinniarnerit maajimi juunimilu piumaartut. Taamaalilluni aasartinnagu illersornissamut isumaqatigiissutissami pingaarnerit, Nunatsinnit peqataaffigineqartussat, inissinneqareersimassapput. Tamatuma qanorpiaq pinissaa suli inissinneqavinngilaq. Politikikkut isumaqatigiinniarnerni killiffiit pillugit soorunami parti aamma Naalakkersuisut ataavartumik oqaloqatigineqarlutillu ataqatigiissaareqatigineqartassapput, Aaja Chemnitz oqarpoq, taanna aamma Nuummi innuttaasunit illersornissamut isumaqatigiissutissaq pillugu marsip 23-anni Hotel Hans Egedemut amerlanaarlutik takkussimasunit aamma immersorneqarluarsimavoq.
Allaaserisaq tamaat Sermitsiami saqqummersumi kingullermi atuaruk, uani:
