Aaja: Danmarkip Kinamut niueqateqarneq akornusissanngilaa

Kalaallit Nunaat nunanut allanut sillimaniarnermullu politikkimut nutaamik periusissiussaaq. Tamatumani Folketingimut ilaasortaq Aaja Chemnitz Larsen (IA) isumaqarpoq, Kalaallit Nunaata Kinamut niuernerup qanoq illersorneqarsinnaaneranik naliliiffigititsinissaa pingaaruteqartoq.

Taassumami ernummatigaa, Danmark qanimut iligisani USA eqqarsaatigalugu Kalaallit Nunaata Kinamut niuerneranut akuliuteratarsinnaasoq:

- Kinamut milliardinik nalilinnik avammut nioqquteqartarpugut USA-mullu avammut nioqquteqanngingajavilluta. Nunanut allanut politikki aamma niuernermut politikkiuvoq, Aaja Chemnitz Larsen oqarpoq, erseqqissaallunilu, Amerikamiut iligisatut qanittutut isumaqarfigigini.

Misissueriaaseq nutaaq pilersinneqalersoq

Politikeri Naalakkersuisut nunanut allanut periusissiamik suliaqarnerannut atatillugu nunanut allanut naalakkersuisumi Steen Lyngemi ataatsimiinnermut peqataaqqammerpoq.

Danmark ilimasaarisimavoq, Kinamit aningaasaliissutit isiginiarneqarnerulissasut, Danmarkillu Kinamit attaveqaatinut pingaarutilerujussuarnut aningaasaliissutit unitsissinnaasariaqassagai, kisianni niueqatigiinneq tamatumannga eqqugaasariaqanngitsoq Aaja Chemnitz Larsen isumaqarpoq:

- Folketingimi misissueriaatsimik suliaqaleruttorpugut, Kalaallit Nunaannut aamma atuuttussamik. Tamatumani attaveqaatinut pingaarutilerujussuarnut aningaasaliinernut atatillugu aamma apeqqusiisoqartassaaq, kisianni Kina niueqatigisinnaasariaqarparput.

Nunanut allanut ministeri ilumuunnginneraasoq

Danmarkilli nunanut allanut ministeria Sermitsiaq.AG-mut oqarpoq, Danmark niuernermut politikkimut akuliunnavianngitsoq:

- Tamanna neriorsuutigisinnaavara. Suliassaqarfiit angerlaanneqarsimasut suliassaqarfiupp angerlaanneqarsimasut, tamatumanilu Kalaallit Nunaat suleqatissaminik nammineq piumasaminik soorunami toqqartuisinnaavoq, Jeppe Kofod (Soc.) oqarpoq. Taamaattorlil niuernerup nunat tamalaat akornanni maleruagassat malillugit ingerlanneqarnissaa erseqqissaatigaa:

- Niuerneq maleruagassat nunarsuarmi niuerneq pillugu kattuffissuarnit suliarineqarsimasut malillugit ingerlanneqartillugu ajunngitsuusarpoq. Tamatumani assersuutigalugu Kinamut soorunami unammilligassaqarpugut, Kina nunat tamalaat akornanni najoqqutassanik malinninngitsutut pasillerneqarmat. Tamanna soorunami qanoq iliuuseqarfigisinnaasariaqarparput, Jeppe Kofod oqarpoq.

Nunatta akikippallaamik niuerutigineqanngissaa alaatsinaassagaa

- Kinamiut attaveqaatinut pingaarutilerujussuarnut aningaasaliinerisa saniatigut Danmarkip sillimaniarnermut politikkimi apeqqutitut isiginninneq pissutigiinnarlugu Kalaallit Nunaata Asiamik niueqateqarnissamut periarfissaanik mattussinnginnissaa pingaaruteqarpoq, Aaja Chemnitz Larsen oqarpoq.

Taanna naliliivoq. Danmarkip USA-mut qaninnerulernissamut Kalaallit Nunaat atoraa, taamaammallu Kalaallit Nunaata suliaq pillugu nammineq isummaminik pilersitsinissaa nukinginnartoq:

- Kalaallit Nunaat USA-mut pisortatigoortumik isiginnittaaseqartariaqarpoq. Sakkutooqarnikkut annertusaasinnaaneq eqqumaffigisariaqarparput, Kalaallit Nunaatalu USA-mut isersinnaanermik annertunerusumik tunisinermut sanilliullugu akikippaallamik niuerutigineqannginnissaa qulakkeertariaqarlugu.