Aaja isornartorsiuivoq: Danskit tusagassiorfiisa Kalaallit Nunaat arajutsivaat
Aaja Chemnitz Larsenip tusagassiorfiit Kalaallit Nunaannut soqutiginninnerat naammannersoq ministeriunermut apeqqutigaa, illoqarfiit pingaarnersaanni qanittukkut qamittoorneq ilanngullugu. Ministeriunerup tusagassiorfiit tulleriiaarinerat pillugu oqallisiginninnianngilaq.
Kalaallit Nunaata pingajorarterutaa qanittukkut ukiuunerani nillerteruttornerani innaallagiaqaranilu kiassarneqanngilaq, naak piffissami tassani ernumanaatilimmik nillertiginngikkaluartoq.
Qamittoornerup illoqarfiit pingaarnersaat ulluni arlalinni annerusumik minnerusumilluunniit unittoortippaa, oqarasuaatillu upalungaarsimaffinni tamani piffissami atorneqarsinnaanngimmata, ikiortissarsiorniarneq ajornakusoorpoq.
IA-mit Folketingimut ilaasortap Aaja Chemnitz Larsenip, suliaq pillugu danskit tusagassiorfiinit soqutiginninnerup qanoq annikitsiginera tupigusuutigaa, Danmarkimilu Kalaallit Nunaannut nalinginnaasumik soqutiginninnermut tunngatillugu ajornartorsiuteqarnermut takussutissaanerarpaa.
- Danskit innuttaasuisa pingajorarterutaat ulluni arlalinnit qamittooqqappata, sungaartunik allagartarsualinnik arlalinnik danskit tusagassiorfiini takusimassagaluarpugut, Aaja Chemnitz Larsen ministeriunerup akunnermi ataatsimi apeqqarissaarfigineqarnerani ilaatigut taama oqarpoq.
Qamittooqqaneq sammineqarpianngitsoq
Aatsaat marlunngormat ullup ingerlanerani danskit tusagassiorfiisa Nuummi qamittoorneq pillugu allaaseraat. Allaaserisaq siulleq Nuummi akunnerni arlalinni qamittooqqasimanermut tunngavoq, kisianni oqarasuaatit internetillu attaveqannginnerat eqqaaneqanngilaq.
Tamatuma kingorna allaaserisaq Ritzauimit allaaserineqartoq tusagassiorfinnit annernit arlalinnit ingerlateqqinneqarpoq, TV2 Nuummit tusagassiortumit allaaserisaqarpoq, taannalu illoqarfiit pingaarnersaanni innuttaasunit upalungaarsimasuniillu pisunit misigisaannit allaaneruvoq.
- Siunissamut sunik kissaateqaraluaruttaluunniit, soqutigisaqanngilluinnarneq uumissuinermit ajornerusoq nassuerutigisariaqarparput. Soqutigeqatigiinnerup atassuteqartippaatigut. Oqaluttuarisaanermi, maanna pisuni siunissamilu. Naalagaaffeqatigiinnermi soqutigeqatigiinneq qulakkeerniarlugu qanoq iliorsinnaavugut, IA-meersup tamanna paaserusuppaa.
Kisianni ministeriunermit apeqqut annerusumik akineqanngilaq, tamannalu danskit tusagassiorfiisa nutaarsiassaatiminnik qanoq tulleriiaarisarnissaannut akulerunniannginnerminik tunngavilersorpaa.
- Danskit tusagassiorfiisa Naalagaaffeqatigiinnermut soqutiginninnissaannik inassinnaanngilakka. Tamanna periarfissarinngilara imaluunniit kissaatigisinnaanngilara, ministeriuneq oqarpoq, nangillunilu:
- Soqutiginninnermut apeqqutip aamma Naalagaaffeqatigiinnermi ilisarisimaqatigiinnissamut tunuliaqutaa paasisinnaavara. Atuarfinni ilisimasaqarneq ukkataraarput, taannalu aamma immitsinnut ilisimasanik pitsanngorsaanissamut aallartiffissaalluarpoq.
Naalagaaffeqatigiinnerup upalungaarsimanera
Ministeriuneq tusagassiuuteqarnermut aamma ministeriusoq, ajornartorsiummik aallussinnginnera, Aaja Chemnitz Larsenip tamatuma kingorna naammaginannginnerarpaa.
- Ministeriunerup danskit tusagassiorfiini Kalaallit Nunaat pillugu ilisimasaqartoqarnerunissaanik pingaartitsinnginnera isornartoqarpoq. Tamanna uagutsinni initoorujussuuvoq, taamaattumillu Danmarkimi Kalaallit Nunaannut soqutiginninnerup annertunerunnginnera equngalaarpoq.
Folketingi arlalinnik aalajangersimasunik suliassaqarpoq, Politiit, Illersornissaqarfik allallu ajornartoornermi upalungaarsimanermik suliaqartut, pisuni ilungersunartuni sulilluartut ilanngullutik.
- Maanna isummersornissamut piffissanngorpoq – siunissami pitsanngorsagassaqarpugut? Danskit tusagassiorfiisa Kalaallit Nunaannut ukkatarinninnerat – imaluunniit amigaateqarnerat – Folketingimi politikkikkut soqutiginninnermut aalajangiisuusinnaavoq, Aaja Chemnitz Larsen Sermitsiaq.AG-mut oqarpoq.