Aaja: Kannguttaatsuliortut eqqugaasunit ungasinniartinneqartassapput
Inatsit allanngortinneqassaaq, taamaalilluni kinguaassiutitigut atornerluisut eqqukkaminnut qanillinerminni eqqartuunneqarsinnaalissallutik, IA-p folketingimut ilaasortaatitaa taama isumaqarpoq.
Meeqqat kinguaassiutimikkut atornerlugaasimasut, atornerluisuminnik aqqusinermi naapitsisinneqartassanngillat.
IA-p folketingimut ilaasortaatitaa, Aaja Chemnitz Larsen taama isumaqarpoq.
Taamaattumik kinguaassiutitigut atornerluisimasut qanillisussaajunnaartinneqarnissaat periarfissaalernissaanik isumaqarpoq, eqqukkaminnut qanillisinnaannginnissaannik tamanna isumaqarluni.
- Meeqqamut kinguaassiutimigut atornerlunneqarsimasumut, pinerluuteqartunik aqqusinermi kingorna naapitsisarnerat kanngunarsaaneruvoq, Aaja Chemnitz Larsen (IA) Sermitsiaq.AG-mut taama oqarpoq.
Eqqorneqartoq ukkatarineqarnerulerluni
Kalaallit pinerluttulerinermut aamma eqqartuussisarnermut inatsisaanni tunngaviuvoq, pineqaatissiinerup pinerluuteqarsimasunut inissiisarfimmi pineqaatissinneqartup najugaata qanigisaani pinissaa. Inuiaqatigiinnut akuuleqqinnissaq ukkatarineqarpoq, pineqaatissinneqartoq taamaalilluni tunngaviusumik ullukkut inuiaqatigiinni angalasinnaalluni.
Kinguaassiutitigut atornerluinermut tunngatillugu, taamatut eqqarsartariaaseqarnerup atorunnaarsinneqarnissaa Aaja Chemnitz Larsenip piumasaraa.
- Pineqaatissiinerup illoqarfimmi allami pisinnaanissaa eqqartuussiviup aalajangersinnaasariaqarpaa, Aaja Chemnitz Larsen oqarpoq.
Eqqartuunneqarsimasup pineqaatissinneqarnini naammassippagu eqqugaasumut qanillisinnaanera aalajangersimasunngortinneqarsinnaanissaa, taassuma aaqqiissutissatut takorloorpaa. Taanna pineqartoq najugaqarfimmi minnerusuminngaanneerpat, taassuma angerlaqqissinnaannginneranik kinguneqarsinnaasoq, Aaja Chemnitz Larsenip ilisimaarilluinnarpaa.
- Inatsit nutartertariaqaripput isumaqarpunga, taamaalilluni eqqorneqartup inatsisitigut inissisimanera qitiunerulissammat, taanna oqarpoq.