Aalajangiussineq pillugu Doris sakkortuumik isornartorsiuivoq
Kommuneqarfik Sermersuumi borgmesteriusimasoq Charlotte Ludvigsen pillugu naammagittaalliuummik Namminersorlutik Oqartussat Nunamut Namminermut Immikkoortortaqarfiata suliaqarunnaarnera politikerip Doris J. Jensenip isumaqatiginngilluinnarpaa.
Nunamut Namminermut Immikkoortortaqarfiup illoqarfiit pingaarnersaanni borgmesteriusimasoq Charlotte Ludvigsen pillugu naammagittaalliuummik suliaqarunnaarnera sapaatip-akunnerani matumani siusinnerusukkut Sermitsiaq.AG-mi allaaseraarput.
Borgmesteriusimasoq taamanikkut kommunaldirektøriusumik Lars Møller-Sørensenimik soraarniuteqarneranut atatillugu isumaqatigiissuteqarnera kommunimut aningaasatigut annaasaqaataasimanngitsoq, Nunamut namminermut immikkoortortaqarfik isumaqarpoq.
Taamanikkut maalaaruteqarneq Siumumeersumit Inga Dora G. Markussenimit suliarineqarpoq, aalajangiinerlu Doris J. Jensenimut nuanninngilluinnarpoq.
Tusagassiuutinut nalunaarummi aalajangerneq tamanna uniuerujussuartutut taavaa:
Uniuerujussuarpoq
- Nunamut Namminermut Immikkoortortaqarfiup ilatsiinnarnera naggataatigut ima kinguneqassaaq, borgmesterit atorfimminnut atatillugu iliuuserisaminnut akisussaatinneqarsinnaajunnaassammata, Doris J. Jensen allappoq nangillunilu:
- Nunamut Namminermut Immikkoortortaqarfiup suliamut matuseriaraluarnera pineqartumut uniuerujussuaannarani aamma inatsisitigut tunngavilersukannerneqarsimasutulluunniit isikkoqanngilaq.
Borgmesteriusimasoq naammagittaalliutigineqarpoq Lars Møller-Sørensenimik soraarniuteqarnissamik isumaqatigiissuteqartoqarnissaa ullut marluk sioqqullugit Kommuneqarfik Sermersooq eqqartuussissuserisumit allagarsisimammat, tassanilu inassutigineqarpoq isumaqatigiissut kommunaldirektørip isumaqatigiissuteqaqatigisimasaa pillugu politiinut nalunaarutiginnittoqassasoq.
Namminersorlutik Oqartussat Nunamut Namminermut immikkoortortaqarfiata misissuinermi kingorna naammagittaalliuuteqarneq ingerlateqqinniarnagu aalajangerpoq, borgmesteriusimasoq allakkap imarisai qanoq ilisimatigisimanerai imaluunniit soraarniuteqartinnani suliamut atatillugu qanoq siunnersorneqarsimanersoq immikkoortortaqarfiup paasisinnaasimanngimmagu.