Nuuk
Aalakoorlutik biilertut arlallit unitsitaapput
Nuummi politiit piffissami matumani nakkutigeqqissaarpaat imigassartorsimallutik biilertuusinnaasut
Sapaatip akunnerata naanerani imigassartorsimallutik biilertut sisamat Nuummi politiinit unitsinneqarput aammalu iffiukkanik immiaaqqanillu tillinniat tigusarineqarlutik.
Nuummi politiit biilertut piffissami matumani julefrokostertoqangaatsiarnerani nakkutigeqqissaarpaat. Ilaammi imigassartorpallaarsimagaluarlutik biilernissamut sapiutinnginnasorisarput. Nuummi politiit nalunaarput imigassartorsimallutik biilertut sapaatip akunnerata naanerani unitsissimallugit.
Nakuuserneq tillinniarnerlu
Angutit marluk arfininngornermi ullaakkut Nuussuarmi Pisiffimmi iffiukkanik ullaakkorsiutinik tilleriaraluartillutik naammattoorneqarput. Angutilli taakku iffiukkanik aggiussisoq nakuuserfigisinnarlugu qimaapput. Angutillu taakku pinerluttaalisitsinermut inatsimmik ulloq taanna unioqqutitseqqissimapput Eurostarimik immiaaqqanik tilleriaraluaramik. Tassani paasisaanerminni politiinit tigusarineqarput.
Pasineqartup aappaa Sermersuup Eqqartuussiviani sassartinneqarpoq ullunilu 18-ni tigumigallagassanngortinneqarluni suliat suliarineqarnerisa nalaanni.
Aajuku sapaatip akunnerata ingerlanerani Nuup politeeqarfiani pisut ilaat:
3 aserorterinerit
1 biilinik tillinneq
2 illumut tillinniarnerit
4 tillinnerit
5 pisiniarfimmi tillinnerit
1 sakkut pillugit inatsimmik unioqqutitsineq
1 oqartussaasunut soqutigitsaatsuliorneq
5 ikiaroornartulerinermik inatsimmik unioqqutitsinerit
1 qunusaarineq
1 ikuallannermut malittarisassat
2 aqqusinermi angallannermut tunngasut
11 angerlarsimaffinni eqqissiviilliornerit
2 angerlarsimaffinni eqqissiviilliornerit meerartallit
1 imerniartarfinni eqqissiviilliorneq
1 aqqusinermi eqqissiviilliorneq
3 imminut toqunnissamik siorasaarinerit
2 aalakoorpallaartut