Nuuk Politi
Aalakoortunut ornigunnerit amerlasuut
Nuummi politiit angerlarsimaffinni aamma aqqusinerni eqqissiviilliortunut, inunnullu aalakoorpallaanut ornigunnernik ulapputeqarsimapput
- Ukiortaalernerata nalaani angerlarsimaffinni aamma aqqusinerni eqqissiviilliortunut, inunnullu aalakoorpallaanut imminnut isumagisinnaajunnaarsimasunut ornigunnerit ulapputigineqarput, Nuummi politiit sapaatip akunneranut nalunaarumminni taama ilisimatitsipput.
Politiit naapertorlugit ilaqutariit angerlarsimaffiini aammalu aqqusinerni tamakku pisimapput, taamaammallu amerlanerpaartaat meeqqanit inuusuttunillu takuneqarsimallutik.
Ilimagineqartut
Politiit erseqqissarpaat nalinginnarmik ingerlatsinerup saniatigut, kiisalu aqqusinermi hashimik tuniniaasunut immikkut iliuuseqarnerup saniatigut, pisut tamakku ataasiakkaat aammalu politiinut naammassiuminartuusut ulapisitsisimasut.
Tamannalu politiit isaannit iligineqareersimavoq.
Meeqqat ukiuat
- Meeqqat inuusuttullu najuuttut isaannit tamanna isigalugu pakatsinarsimassaqaaq. Tassami meeqqat inuusuttullu tamarmik naatsorsuutigaat, inersimasut akisussaaffitsik pimoorunnerullugu tigusariaqaraat, ingammik ukioq manna qinikkanit meeqqat ukiuannik taaneqarmat, politiit pigaartuanni pisortaq Søren Bendtsen tusagassiuutinut nalunaarummi allappoq.
Aamma atuaruk: Kielsen: 2016 meeqqat ukiorissavaat
- Taamaammat ukiortaami pilersaarutaasinnaavoq, isumatusaarluni inuuneq, meeqqanut inuusuttunullu siunissaq eqqarsaatigalugu pingaarnerpaasunut toqqissisimasumik sinaakkutaqartitsinermut pilersitseqataaneq, politiit taama oqariartuuteqarput.