Aalborg Havn taarsiivigineqarnissaminik siorasaarisoq

RAL-p atuiunnaarniarluni aalajangernera, Aalborg Havnip paasissinnaanngilaa.

- Royal Arctic Linep nalunaaruteqarnera pakatsissutigeqaarput, Aalborg Havnip siulersuisuini siulittaasoq, borgmester Thomas Kastrup-Larsen taama oqarpoq.

Nalunaaruteqarneq Aalborg Havnimit annertunerusumik tupaallaatigineqanngilaq. RAL-immi ukiarmilu siunissami Aalborg atorunnaarniarlugu nalunaaruteqareersimavoq.

Tamatuma kingorna taakku suleqatigiit arlaleriarlutik ataatsimiittarsimapput, tassani RAL-ip isumaqatigiissut 2022-mi atorunnaartussaq naammassissangaa, Aalborg Havnimit naatsorsuutigineqarsimangaluarpoq.

- Massakkut Royal Arctic Linemut pitsaasumik oqaloqatiginninnerit ingerlatileruttorpagut, tassani taakku Alborg Havnip aalajangersimasumik umiarsualivittut Kalaallit Nunaata 2022 tikillugu isumaqatigiissut taperserneqarluni, taamatullu Aalborg Havni Kalaallit Nunaata umiarsuarlivianik ineriartortitsilluni aningaasaliippat isumaqatigiissutip sivitsorneqarsinnaanera oqaloqatigiissutigalutigut, Thomas Kastrup-Larsen oqarpoq.

RAL-immi pingaartittuarpaa qanoq isillutik suliffeqarfimmut periarfissanik nutaanik pilersitsinissartik aammalu atuisunut akikinnerusumik pitsaanerusunillu nioqqutissiaqarnissaq.

- Kalaallit Nunaanut pitsaanerpaamik aalajangiinissatsinnik pisussaaffeqarpugut, RAL-p pisortaanera ukiarmi taama oqarpoq.

RAL-ip massakkut naatsorsuutigisinnaavaa Aalborg Havnip taarsiivigineqarnissamik piumasaqarnissaa.

- RAL-i isumaqatigiissummit atorunnaarsitsiniarpat tamanna aatsaat isumaqatigiissummik naammassinnginnermik pisinnavoq, tamatumalu kingunerissavaa taarsivigineqarnissamik piumasaqarneq, Thomas Kastrup-Larsen oqarpoq.