Aalisariummi ajunaartoqarnera eqqartuussivilersuunneqartoq

Angallammi inuttat akunnerit 16-nit ingerlatiinnarlugu ulorianartorsiorfiusumi sulipput. Taakkulu ilaat angallammit nakkarluni ipivoq.

Unnerluussisussaatitaasut Savalimmiut eqqartuusiviani pisoq ataasinngormat marlunngormallu suliaraat.

Indonesiameersoq

Ajunaartoq Indonisiameersuuvoq 24-nik ukiulik. Februaarillu qaammataani 2014-mi ajunaarsimalluni.

Taanna nunaqqataalu angallammi qanoq suleriuseqassanersut iluamik ilinniartinneqarsimanngitsut unnerluutigineqarpoq.

Aammalu savalimmiut, spanskit tuluillu oqaasiinik oqalussinnaannginneri unnerluussinermut ilanngunneqarlutik.

Angallatik qaava tukattoq

Inuttaasut silarluttumi angallatip qaani qassusiornerini 24-nik ukiulik ajutoorpoq.

Malissuillu miiterit arfinillit arfineq-pingasullu akornaniissimallutik. Angallatillu qaava tukammat tigussaasut sumi tamaani aalaaluttuinnaasimallutik.

Angallammi inuttat isumannaatsumik sulisinnaasimanngillat. Taamattoqarneranilu 24-nik ukiulik pituutamut naatilluni nakkarsimasoq unnerluusisussaatitaasut isumaqarput. Savimmillu tingoriaannarmik soqanngimmat pituutaq kittorarneqarsinnaasimanani.

Paarnaarussaaqqusipput

Pisoq tunngavigalugu angallatip naalagaa paarnaarussaaqqusaaneranik piumasaqartoqarnera suliap immikkuullarissutigaa.

Paarnaarussaaqqusinerup saniatigut umiarsuaatileqarfik akiligassinnissaa piumasarineqarpoq. Taakku sillimaniarneq salliutinnagu sipaarfigisimasutut unnerluunneqarlutik.

Suliap ingerlanerani inuttaasut nunanit allaneersut pisoq pillugu assigiinngiiaanik oqaluttuarsimapput.

Eqqartuunneqartut pisuunnginnerarput.

/ritzau/