Aalisarneq: Saarullinniarneq annertusiartorpoq
Imaassinnaavoq nunatsinni "saarullit akii pillugit sorsuttoqartoq". Taamaattorli aalisartut saarullinniarnertik annikillisinnagu annertusiartortippaat, aalisakkat qaleruallillu nunami suliffissuarnut tunisanut nunatta naatsorsueqqissaartarfiata kisitsisaataasa nutaat ersersippaat.
2018-miit maannamut saarulliit nunami suliffissuarnut tunitsivinnullu tunineqartartut ikiliartorusaariarlutik maanna amerliartoqqilersimasut kisitsisit kingulliit takutippaat.
Taamaattorli nunami suliffissuarnut tunitsivinnullu tulaanneqartartuni qalerallit raajallu tunisaanerpaapput. Tamanna aamma naatsorsueqqissaartarfiup kisitsisaataannit ersersinneqarpoq.
Nunaqarfimmiut aalisaqataalluarput
2023-mut maannamut killiffik ilanngullugu nunatta naatsorsueqqissaartarfiata paasissutissanik nutarterinerini aamma ersersinneqarpoq nunanatsinni nunaqarfimmiut nunami suliffissuarnut tunitsivinnullu aalisakkanik tuniseqataalluartartut. Pingaartumik qaleralinniarnermit tulaassuisoqarluartarluni.
Taamaakkaluartorli nunaqarfimmiut saarullinniaqataanerat suli angumavinngilaq, tassunga pissutaaqataasinnaavoq saarulliit suliffissuarnut tunitsivinnullu ingerlateqqitassat amerlasuutigut umiarsualiinikkut tunitsiveqartinneqartarnerat.
Aammattaaq nunami suliffissuarnut tunitsivinnullu nunamut tulaassisussaatitaaneq atuukkaluartoq, takuneqarsinnaavoq nunatsinni suliffissuit tunitsiviillu sinerissap qanittuani aalisartunit tunisassiassanik annertunerpaamik pilersorneqartut. Assersuutigiinnarlugu avataasiorluni qaleralinniarnermit aammalu saarullinniarnermit tulaassisussaatitaaneq tunngavigalugu avataasiortut pisassaatiminnit 25 procentii nunamut tulaattussaatitaagaluaraat sinerissap qanittuani aalisartut nunami suliffissuarnut pilersuinerpaapput.