Ussassaarut
Aalisarnermut inatsisissaq eqqugaqaqqippoq: Karl Tobiassen tunuarpoq
Piniarnermut aalisarnermullu naalakkersuisup aalisarnermut inatsimmik nutaami angusat amigarnerisa kingunerannik eqqugaavoq.
Ussassaarut
Ussassaarut
Ussassaarut
Naalakkersuisoqarfimmi pisortaasimasoq sapaatip-akunnerata siuliani tunuartinneqarpoq. Maanna piniarnermut aalisarnermullu naalakkersuisoq, Karl Tobiassen, tunuarniarluni nammineq aalajangerpoq. Múte B. Egedemut Siumut saqqummiussaani taama allagaqarpoq.
- Siorna akisussaaffik pingaarutilerujussuaq tigusussanngorakku nutaamik aalisarnermut inatsimmik pilersitsinissaq neriorsuutigisimavara. Inuttut ajuusaarutigisannik suliaq ukiaq manna Inatsisartunut oqaluuserisassanngortinnissaa angumerineqarsinnaasimanngilaq, taamaattumillu Naalakkersuisutut neriorsuutiga eqquutsissinnaasimanngilara. Tassunga atatillugu politikikkut akisussaaffik tamarmiusoq uanniittoq tiguara, ilaatigut taama tunngavilersuuteqarpoq.
Naalakkersuisoqarfimmi pisortap tunuarnera piumassutsimik tunngaveqannginneruvoq, kisianni illuatungeriit isumaqatigiissuteqarnerisigut pivoq. Karl Tobiassenilu immaqa aamma Naalakkersuisuni annertuumik nikittoqarnissaanik pilersaarummut ilaavoq, tamanna sapaatip-akunnerata tulliani pissasoq naatsorsuutigineqarpoq.
Mimi Karlsenip peqqinnissaqarfimmut akisussaaffik tunuarfigalugu Inatsisartunut siulittaasunngorpoq. Peter Olsenip tunuarnera nikisitsiffioreerpoq, tassungalu atatillugu nutaamik naalakkersuisoqalernissaa naatsorsuutigineqarpoq, Sermitsiaq.AG-llu tusarfii naapertorlugit Siumup aningaasaqarnermut naalakkersuisoqarfik akisussaaffigilissavaa, Naaja Nathanielsen maanna tassani naalakkersuisuuvoq.
Aalisarnermut Piniarnermullu naalakkersuisoqarfik pissaaneqarfiusoq aamma nutaamik naalakkersuinikkut aqutsisoqalissaaq.
Karl Tobiassen Inatsisartuni ilaasortaaleqqissaaq.