Aalisarnermut inatsisissaq: Tusarniut kinguartittariaqarpoq
Aalisarnermut inatsisissaq akuerineqaruni aappaagu atuutilersussaq januaarip ulluisa 24-anut tusarniutigineqarnera kinguartinneqartariaqarpoq. Taama Sisimiuni aalisartunit ataatsimiissutigineqarmat oqariartuutigineqarpoq. Ataatsimiinnermut Sermitsiaq.AG malinnaajartorpoq.
Sisimiuni sila issilluni taarsilereersoq ualikkut nalunaaqutaq pingasunngortoq piniartut aalisartullu Amerlumut isaapput. Issiaviit sanileriiaallutik tunuleriiaat ulikkaangajalluinnarlugit issiavigineqarput. Pappiaqqat ataatsimiinnermut tunngasut issiavinnut iliorarneqarsimallutik.
Saavani peqatigiiffinni SAPP-mit SAAPP-miillu siulersuisuni ilaasortat siulittaasullu issiapput, ataatsimiinnermi oqaaserineqartussanut tusarnaarnissaminnut allattuinissaminnullu piareersimallutik.
Kaffi tiilu oqallinnermut kissassaataasut
- Kaffeqarpoq teeqarlunilu, ataatsimiinnerup aallartinngilaattaani siulittaasoq Uvdloriak Olsen isersimasunut neqeroorluni oqarpoq.
Silamiit issittumiit piniartut aalisartullu isaareersut kaffimik tiimillu oqallinnissamut kissassaasersulerput. Ataatsimiinnermilu peqataasut oqaasissaaleqinngillat.
Aalisarnermut inatsisissaq 16-inik qulequtaqartoq imaqaqisorlu tamakkiisumik aalisartunit paasineqarsinnaasimanngimmat inatsisilerituumit aggertitsilluni nassuiaasoqartariaqaraluartoq ataatsimiinnermi qaqinneqarpoq.
- SAPP aamma SAAPP-mit Aalisarnermut Piniarnermullu Naalakkersuisoq aammalu KNAPK peqatigiillutik Aalisarnermut Inatsisissatut tusarniummut SAPP-mi aammalu SAAPP-mi ilaasortanut nassuiaajartussasut ilaasortat kissaatigaat, tusarniummut iluarsiissuteqaqatsigiissinnaaneq siunertaralugu, ataatsimiinnermi kissaatigineqarmat taama siulittaasoq allappoq.
Aalisarnermut inatsisissaq allakkatigut nassiutiinnarnagu sukumiisumik sammineqarnissaa ataatsimiinnermi aamma kissaatigineqarpoq.
- Aalisarnermut Piniarnermullu Naalakkersuisoq aammalu KNAPK peqatigiillutik Aalisarnermut Inatsisissatut tusarniummut KNAPK peqatigiiffiiniit tamaniit toqqakkanik Nuummukartitsissasut tusarniullu sukumiilluinnartumik serminarimik taallugu sammineqassasoq iluarseeqatsigiissinnaanissaq siunertaralugu, siulittaasoq tusarniummut akissuteqarluni ilanngullugu allappaa.
Kinguartinneqartariaqartoq
Tusarniut januaarip 24-anut killeqarpoq, aalisartulli inatsisissap imaa tamakkiisumik suli paasinngimmassuk tusarniut kinguartinneqartariaqartoq oqaatigineqarpoq.
- Qulaani taaneqartut naaperiutit tunngavigalugit Aalisarnermut Inatsisissamut tusarniutip piffissaligaanerata kinguartilaarsinnaanera nutaamik naliliivigineqarnissaa aamma kissaatitta ilagaat.
Amerlumi aalisartut piniartullu ataatsimiinnermi ilaatigut sakkortuumik oqalipput. Malunnarluni qullersaninngaanniit paaseqqugaluartut. Oqallinnermi peqataasut kissassimaaneranut peqqutaaqataavoq aalisarnermut inatsisissamut ilaatitaanngitsutut misigisimammata.
- Taamatut kissaateqarnerup tunngavigaa Aalisarnermit Inuussutissarsiuteqavissut Aningaasarsiuteqavissut FN-illuaaliangersagaanik tunngavilimmik illersugaasut annerusumik ilaatitaannginnerat Aalisarnermut Inatsisissatut siunnersuummut.
SAPP tassaavoq Sisimiuni Aalisartut Piniartullu Peqatigiit, kiisalu SAAPP Sisimiuni Angallateerarsortut Aalisartut Piniartut Peqatigiiffiulluni.
Aalisarnermut inatsisissaq upernaakkut inatsisartuni saqqummiunneqassaaq, akuerineqarunilu aappaagu januaarip aallaqqaataani atuutilersinneqassalluni.
Aalisarnermut Piniarnermullu Naalakkersuisoq Kim Kielsen sisimiuni piniartut aalisartullu Sisimiut Hotelimi unnugu nalunaaqutaq 19.00 ataatsimeeqatigissavai.