Aalisarnermut inatsit nutaaq sumut piva?
Ukiaanerani ataatsimiinnissamut oqaluuserisassat saqqummiunneqarput, kisianni aalisarnermut inatsimmik nutaamik siunnersuuteqartoqanngilaq. Naalakkersuisoqarfik naapertorlugu inatsisissatut siunnersuut kingusinnerusukkut nalunaarutigineqarumaarpoq.
Aalisarneq pillugu ataatsimiititaliarsuup isumaliutissiissutaata saqqummiunneqarneranit ukiut marluk qaangiuttut, aalisarnermut inatsimmut nutaamik siunnersuummik suli takussaasoqanngilaq. Aalisarneq pillugu ataatsimiititaliarsuaq nunatsinni inuussutissarsiutit pingaarnersaannut sinaakkutinik nutartikkanut siunnersuuteqartussatut pilersinneqarpoq.
Tassanngaanniilli naalakkersuinermik suliaqartut tungaannit ataatsimiititaliarsuup inassuteqaatai arlallit nalornissutigineqarsimapput. Ilaatigut naalakkersuisoqataasup Siumup inassuteqaatit arlallit itigartippai, inatsisissatullu siunnersuutaasussaq pissangalluni utaqqineqarpoq.
Suli utaqqisoqarallartussanngorpoq. Ukiaanerani ataatsimiinnissamut oqaluuserisassat saqqummiunneqarput, aalisarneq pillugu inatsimmut nutaamut siunnersuut ilaanngilaq.
Aalisarnermut naalakkersuisup, Karl Tobiassenip (S), siunnersuummik ukiaanerani ataatsimiinnermi saqqummiisoqarnissaa piviusorsiortuusoq januaarimi nalilerlugu oqaatigaa. Partiinut isumaqatiginninniarnerit ingerlasut aasaanerani oqaluttuarpoq.
Piffissap killigitinneqartup kingorna tunniukkusukkaat
Inatsisissatut siunnersuut kingusinnerusukkut tunniunneqassasoq Inatsisartunut qinnuiginnissutigineqarsimasoq, Aalisarnermut Piniarnermut Naalakkersuisoqarfik marlunngornermi Sermitsiaq.AG-mut ilisimatitsivoq, allamillu oqaaseqarsinnaanngillat.
Taamaattumik siunnersuut qaqugut Inatsisartunut nassiunneqassanersoq ilisimaneqanngilaq, kisianni siunnersuut tusarniutigineqaqqaartussaavoq, tamannalu suli pinngilaq.
Tusarniaaneq piffissamik atuiffiusinnaasarpoq. Naligiissitaanermut immikkoortitsinnginnissarlu pillugit inatsit assersuutigalugu qaammat ataaseq tusarniutigineqarpoq, taamaattumillu aalisarnermik inuussutissarsiortunit inatsisissatut siunnersuummik misissuinissaq siunnersuuteqarnissaq assut soqutigineqassaaq.
2017-imi aalisarnermut inatsisissatut siunnersuut nutaaq ukiaanerani ataatsimiinnermi saqqummiunneqarpoq, kisianni siullermeerneqarnermit ingerlaqqinngilaq. Kingusinnerusukkut Aalisarneq pillugu Ataatsimiititaliarsuaq pilersinneqarpoq, siunnersuuteqartoqarnissaa siunertarineqarluni.