Aalisarnermut siunnersuisoqatigiit aalisarneq sunniuteqarluanngitsoq erseqqissarpaat
Aningaasaqarnermut Siunnersuisoqatigiit nalunaarusiaminni nutaami, ilaatigut aalisarnerup sunniutikinnera erseqqissarlugu, sunniuteqarnerusumik ingerlatsineq angusaqarluarnerunerlu pigissaarnerulernissamut aqqutissaasut erseqqissarpaat.
Pigissaarnerup siuariartornera ingerlaannassappat naammassisaqarluarnerusoqartariaqartoq, Aningaasaqarnermut Siunnersuisoqatigiit 2024-mut upernaakkut nalunaarusiaminni allapput.
Siunnersuisoqatigiit erseqqissarpaat naammassisaqarluartoqassappat ilinniartitaaneq qaffasinnerusariaqartoq, pitsaanerusumillu sulisunik atorluaasoqarnerusoqartariaqartoq, aammalu aalisarnermit pisortallu suliffeqarfiutaannit aningaasanik allamut nuutsitsisoqartariaqartoq.
Siunnersuisoqatigiit aalisarnerup allanngortinneqarnerani nunatsinni sammisat oqallisaangaartut ilaat akuliuffigisimavaat - inatsissatut siunnersuut tusarniaassutigineqarpoq, tamannalu misigissutsinik sakkortuunik qaffakaatitsivoq.
Avataasiortut akissarsiarissaarnerussapput
Aningaasaqarnermut Siunnersuisoqatigiit isumaqarput aalisarnerup iluani naammassisaqarluarnissaq Kalaallit Nunaata unammillersinnaaneranut aalajangiisuulluinnartoq:
- Aalisarnermi naammassisaqarnerunerup kingunerisaanik suliffiit akissarsiarissaarfiusut pilersinneqassapput, taamaalillunilu akileraarutit akitsuutillu, pingaartumik erniatigut akitsuutit, pisortat aningaasaqarnerannut annertuumik isertitaqartitsissallutik, Aningaasaqarnermut Siunnersuisoqatigiit allapput.
Siunnersuisoqatigiit tikkuarpaat avataasiorluni aalisarneq sinerissap qanittuani aalisarnermit pissarsiffiulluarnerusinnaasoq:
- Aalisarnermut Ataatsimiititaliarsuup paasivaa avataasiorluni aalisarnermi sulisartumut ukiumut akissarsiat sinerissap qanittuani raajarniarnermit qaffasinnerujussuusut, aamma tikkuarpaa sinerissap qanittuani aalisarnermi pisassiissutit piujuartitsisumik pitsaasumillu aalisarnermut naleqqussarneqarnissaat pisariaqartoq, siunnersuisoqatigiit allapput.
Inuiaqatigiit aningaasaqarnerata ineriartornera aalisarnermut attuumassuteqarpoq
Pisuussutit aqunneqarneranni uumassusilerisut siunnersuinerannit pisassiissutit
amerlanerungaarnerunissaannut tatisisarsimasut, aalisariutinillu
amerlavallaalersitsisimasoq inerniliunneqarpoq:
- Inuiaqatigiit aningaasaqarnerannik ineriartortitsinissamut aalisarnerup aningaasaqarnikkut uumassusillillu tungaatigut piujuartitsisuunissaa pingaaruteqarpoq. Naammassisaqarluarumalluni inuussutissarsiut isumannaallisartariaqarpoq, sulisut suliassaqarfinni allani suliaqarnissaannut piffissaqarnerulersitsinikkut pigissaarnermut tapersiisoqassalluni.
Aammattaaq siunnersuisoqatigiit naapertorlugit pisortat ingerlatsiviini naammassisaqarnerunissaq sunniuteqarluarnerunissarlu pisariaqarluinnarpoq, inuussutissarsiornermullu tapiissutit pillugit misilittakkat pitsaanngitsut aamma erseqqissarneqarluni.