Aalisarnerup ajutoornissaa qanoq ililluta pinngitsoortissinnaavarput?

Aalisakkat tassaapput Kalaallit Nunaata isumalluutai aningaasarsiutaanerpaat. Kalaallit Nunaanni nutaaliaasumik aalisarneq ukiuni 50-iinnarni atuussimagaluartoq aalisakkat Kalaallit Nunaata avammut tunisartagaasa 90 procenteraat. Aalisakkat assigiinnarpaat aningaasat! Imaq inuussutissaqarluartoq, ilisimasarpassuit sulisinnaasullu sisamararterutaasa aalisarnerup iluani suliaqarnerat tunngavigalugu Kalaallit Nunaat tassaalersimasoq nunarsuarmi naalagaaffiit aalisarnermik ingerlatallit annerpaartaasa 51-iat. Aalisakkalli aamma isumalluutitut nungujasuupput – nunap iluani avataanilu sunnerneqarnerit tunngavigalugit aalisarneq suliffeqarfiuvoq nalorninartulik. Apequtaalerpoq Kalaallit Nunaata inuussutissarsiut ineriartorteqqissaneraa aalisarfinnillu nutaanik ujaasilluni?

Kalaallit Nunaata isertitai ullumikkut assigiinngitsunit marlunneersuupput: Ataatsimoortumik tapiissutinit aalisarnermillu. Kalaallit Nunaat taakkuninnga marlunnik isumalluuteqarluinnartuuvoq. Ataatsimoortumik tapiissutit aalaakkaallutillu siumut eqqoriaruminartuusut aalisarnermik inuussutissarsiorneq allanngorartuuvoq. Immap kissassusaata allanngorarneri, ungasissumi avammut niuerfik eqqoriaruminaatsoq pisassiissutillu killeqartut tunngavigalugit aalisartut ajornakusoortunik atugassaqartitaasarput. Aalisarnermik suliffeqarfissuit angisuut kisimik naleqqussaanermut pisariaqartumut aningaasaliinissamut naammattunik aningaasaateqartarput. Sinerissamut qanittumi aalisartut namminersortut mikisunik angallatillit amerlanerpaartaat ilungersorput naammassisaqarsinnaanerullu killeqarneranik amerlavallaarnermillu atugarliortitaallutik.

Kalaallit Nunaanni aalisarneq inuussutissarsiutitut nutaajuvoq sulilu ineriartorluni. Maannakkorpiaq unammilligassaq angisooq tassaavoq aalisarnermik inuussutissarsiornerup misikkarippallaarunnaarsinnissaa niuernerpalaarnerusumillu ingerlatilernissaa. Periarfissat pioreerput! Nunarsuarmi niuerfinni aalisakkanik piumasaqarneq annertusiartuinnartussatut ilimagineqarpoq, siunissamilu sikuunikinnerusalerpat assartuinermi aningaasartutit appariarnissaat ilimagineqarpoq. Immaqa aalisarnerup ingerlalluaqqilernissaa uaneralaarsuarmiippoq – immap kissatsikkiartorneratigut aalisakkat nutaat kujataanit takussinnaapput, suliffissuarni allani sulinit ineriartortitsinissamut periarfissanik nutaanik pilersitsisinnaallutik, naatsorsuutigineqarporlu naammassisaqarsinnaanerup pitsanngorsarneratigut inuit 700-t missaanniittut ilisimasarpassuillu sinerissamut qanittumi aalisarnermit avissaartinneqarsinnaasut.

Kalaallit Nunaat aamma aalisakkanik alliartortitsisassava? Aalisakkat uumatitsivinneersut nunarsuarmi niuerfinni aalisakkat tamarmiusut affaannik amerlassuseqaleriartorput piumaneqarnerallu annertuseriarujussuartussatut ilimagineqarluni. Issittumi Rusland, Norge Canadalu nunami imaanilu aalisakkanik uumatitsiveqarput – aquaculturenik. Erngup nukinganik nukissiorfinnit nukimmik sinnerussamik, nunarsuarmi aalisakkanik suliffissuit annerpaartaasa ilaannit ilisimasanik raajanillu tunisassiornermit eqqagassarpassuarnik nerukkaatissanik aalisakkanik suliffissuup nutaap patajaannerusullu ineriartortinnissaanut Kalaallit Nunaat atorluaasinnaava?