Aalisartut ikiorserneqanngillat
Kommuneqarfik Sermersooq, unammilleqatigiinnermut inatsisinik malinnittussaagami aalisartunik ikiorsiinissamut periarfissaqanngilaq.
Kommuneqarfik Sermersuup kommunimi aalisartunik ajornartorsiortunik ikiorsiisinnaanermik misissuinini naammassivaa. Umiarsuarmik Nuup Kangerluani tunitsiviliinissamut tapiinissamut periarfisaqarnersoq misissuisoqarnera iluatsillugu misissuisoqarsimavoq.
– Kommuneqarfik Sermersooq allatuulli unammilleqatigiinnermut inatsisinik malinnittussaavoq, taamaattumillu KANUKOKA Nunallu iluani pissutsinut allaffik kiisalu unammilleqatigiinnermut ataatsimiititaliaq kommunip tapiinissamut periarfissau siunnersuullu pillugit isummertinneqarsimapput, Kommuneqarfik Sermersuumi Inuussutissarsiutinik Inerisaanermut Immikkooqarfik nalunaarpoq.
Inussutissarsiutinik inerisaanermut ataatsimiititaliap siulittaasuata Esmar Bergstrømip aalajangerneq taanna ajuusaarutigaa.
– Suliassaq inuussutissarsiutinik inerisaanermut ataatsimititaliami oqaluuserinikuuarput - siunnersuummullu tassunga tapiisinnaannginnerput uanga ajuusaarnartutut isigaara, aalisartortagut piffissami matumani ajornartorsiortorujussuummata.
Aalisarnermut tapiisarneq aamma allanut tunngatillugu ajornartorsiutaavoq, inatsimmi allassimammat ilaatigut makkununnga tapiisoqarsinnaanngitsoq.
1) siunertanut, inatsisartut peqqussutaanni aalisarnermut, piniarnermut nunalerunermullu tapiisarnermut attuumassuteqartunut,
2) suliniutinut sulisoqarnermut inatsisip ataaniittunut.
– Taamattumik aalisartut pineqartut ikioruminaatsorujussuusussaapput, suliniut nutaamik pilersitsinerulluni tapiisarnermut malittarisassat avataanniissimanngippat taamalu allanut unammillertuusimanani, Inuussutissarsiutinik Inerisaanermut Immikkoortoqarfimmiit nalunaarput.
Kommuneqarfik Sermersuumi aalisarnermi nutaamik inerisaanissamut periarfissanik pilersitsiumalluni piaartumik aalisanermut politikiliortoqassaaq, Kommuneqarfik Sermersuumi aalisarnerup siunissami ineriartortinnissaanut naleqquttuusussamik.